Mizoram an chak lo nawn

BCCI hnuaia Men's U-23 State A Trophy Plate group final-ah Mizoramin nimin khan Meghalaya an hmachhawn a, group match hnuhnung bera an hneh loh Meghalaya lakah an tlawm nawn. Meghalaya hian 307/7 siamin Mizoramin 171 runs chauhin an chhanglet.

PCA New Cricket Stadium, New Chandigarh-a inkhelah ṭhumvawra vannei Meghalaya-in bat hmasak an thlang. Mizoramin Meghalaya opener Sachin vawm out nghal mah se an thiampuipa Dipankar-a'n 51 runs a siam a, player dangin an rawn thlawp ṭha bawk.

Shavian-a'n 76 runs a siam bakah Pushkar-a'n thi loin 105 runs a siam a, over 50-ah wicket sarih hlohin 307 runs an siam. Mizoram bat hun a thleng a, target a san avangin an che buai.

Captain Johan Lalbiakkima'n (Ramhlun Venglai) 13 runs chauh a siam a, Ṭhuampui tlangval Sahil Sharma pawhin 36 runs bak a siam thei lo. Tetea'n 41 runs rawn siam ve mah se a khat tawkin an out reng a, over 43-ah 171 runs siamin an thi fai vek.

Meghalaya hian group stage an thunun ang chiahin final-ah pawh an che ṭha a, 136 runs-a hnehna changin Plate group champion an ni. Mizoram erawhin history siam tum viau mah se an tum ram an thleng zo ta lo.

Mizoram manager Rosiamliana Ralte Junior chuan, "Meghalaya hi kum lamah pawh keini ai chuan an u deuh hrim hrim. Mizoram hi chu cricket bikah phei chuan kum dik tak zelin kan khel a, keini aiin an puitling zawk," tiin Vanglaini a hrilh.

Junior Ralte chuan sawi chhunzawmin, "Keini aiin khelhna hmun an nei ṭha a, match fitness-ah kan inthlau bawk. Chutihrualin kan nauten theihtawp tak meuh meuh an chhuah a, an chungah kan lawm. Champion kan dil a, champion pawh kan tum. Mahse, chunglamin hun a la ti lo ang," tiin a sawi.