Mizoram tan history siam kan duh - Junior Ralte

BCCI hnuaia Men's U-23 State A Trophy Plate group final chu vawiin chawhma dar 9:00 hian Mizoram leh Meghalaya ten an khel dawn. Mizoram manager Rosiamliana Ralte Junior (Zotlang) chuan Mizoram tan history siam an duh thu Vanglaini a hrilh.

Inelna hi PCA New Cricket Stadium, New Chandigarh-ah khelh a ni a, Mizoram hian group match hnuhnung berah Meghalaya an hneh loh avangin champion rinkai an ni ta lo. Chutihrualin Mizoram lam hian an match hnuhnung berah chesualah an inngai a, hneh theih ngei an inring.

Mizoram manager Junior Ralte chuan, "Player chhungte leh duhsaktu ṭhahnem takten min ṭawngṭaipui char char a, an chungah kan lawm. Final kan khelh tur atan min ṭawngṭaisak turin Mizo mipuite ka ngen. Player leh coaching staff bakah association-in history siam kan châk a, trophy nen ngei rawn haw hi kan duhthusam a ni," tiin Vanglaini a hrilh a, coaching staff bakah team thawhhona a ṭhat thu a sawi.

Mizoram manager hi Moinak Sengupta a ni a, assistant coach hi Rw Lalhmingliana, Chanmari a ni. Captain Johan Lalbiakkima (Ramhlun Venglai) leh vice captain Sahil Sharma (Ṭhuampui) te an che ṭha a, Mizoram senior team tan Syed Mushtaq Ali Trophy-ah koh an ni hial. Final-ah pawh Mizoram innghahna tur an ni ang.