ISL club-te an chawl

Indian Super League hma hun a chian loh miau avangin, ISL club engemaw zat chuan training pawh nei loin an chawl lailawk a, an kal zel dan tur a la chiang rih lo.

ISL champions Mohun Bagan Super Giant meuh pawhin training an nei rih lo a, Kolkata club thuneitu pakhat chuan, "Thla tharah player-te contract pawh kan zir chiang leh ang," tiin a sawi hial.

Kerala Blasters pawhin training an titawp rih a, club CEO Abhik Chatterjee chuan, "Che thei loin min siam rih a ni ber mai. Player mai ni lo, staff-te pawhin kan kal zel dan tur hriat an duh a, keini pawhin kan hre chuang lo!

"A êng zawnga thil thlir kan duh a, mahse, a hlauhthawnawm tawlh tawlh a ni ber mai," a ti a, ISL hma hun chiang lo chunga pangngai taka club kalpui chu a harsat thu a sawi.

Chennaiyin FC chuan an player-te hnenah training an ṭan leh hun tur an sawi theih loh thu an thlen tawh a, NorthEast United chuan an player-te chu 'chawlh rei zawk' an pek thu an hrilh a, training an la neih mai loh hmel.

Odisha phei chu kum laihawla ISL a buai aṭang tawh khan an reh vang vang a, Super Cup-ah pawh ISL club tel lo awmchhun an ni.

Hetihlai hian Bengaluru head coach Gerard Zaragoza, assistant coach Sebastian Vega leh strength and conditioning coach Ioannis Gkiokas te chuan ISL hma hun chiang lo reng karah Bangalore club hi an chhuahsan a, Greece club an zawm dawn.