Milan-in Modric chelh an duh

AC Milan chuan an midfielder Luka Modric chu kum khat dang chelh an duh nia sawi a ni a, kum 40 mi midfielder hi Serie A club hian an chelh a nih chuan kum 41 a nih thlengin European top flight league a khel dawn tihna a ni!

Croatian midfielder Modric hian nipui transfer-ah khan Real Madrid chhuahsanin Milan hi a pan a, a kum zat ngaihtuahin, fans tam tak chuan European top flight league khelh zel a la tum chu an ngaihtuah.

Modric hian Milan-ah hian kum khat atan contract ziakin, kum khat dang pawhsei theih tura tih a ni a, Italian club hian a contract neih sa anga pawhsei tur hian indawrna neihpui an tum.

Real Madrid-a kum 13 zet a khelh chhunga nomawi zawng zawng chawitu Modric hian Serie A match 11 an khelh tawhah bul a la ṭan vek a, vawi hnih chiah lakchhuah a ni!

Milan tan inelna hrang hrangah match 12 khel tawhin goal khat a khung a, assist vawi hnih a nei bawk. Croatian midfielder hi khelmuala a ṭangkai piah lamah dressing room-ah a tawnhriat an ṭangkaipui a, hei hi Milan-in chelh an duh chhan langsar zingah a tel.

Rossoneri coach Massimiliano Allegri leh sporting director Igli Tare te chuan Modric hi chelh ngei an duh nia sawi a ni a, tun ang kumah pawh naupang zawkte entawn tlak khawpa a la invawngte chuan an mit a titlung hle niin an sawi.

Modric hian a kum tam tawh viau mah se, ram tana inkhelh pawh a la chawlhsan lo a, tun international break-ah pawh ram tana inlan tura koh niin, Croatia captain dinhmun a la chelh mek!'

Kum 40 midfielder hian ram tan match 192 khel tawhin, goal 28 a khung a, assist vawi 31 a nei bawk. Croatia hian zanin dar 1:15-ah hian World Cup qualifier khel turin Faroe Islands an mikhual ang.

Croatia hian qualifier-ah hian match hnih khelh tur la neiin, group L-ah table chung ber an luah mek a, an hnuai chiaha awm Czech Republic aiin point thumin an sang zawk mek.