Ka chhuak dawn lo - Son

Nipui transfer-a Tottenham Hotspur chhuahsan a, MLS club Los Angeles FC zawmtu Son Heung-Min chuan loan-a chhuah tumna a neih loh thu a sawi a, MLS club-ah hun hman zel a tum.

Major League Soccer hi Europe ramte nen an season hman dan a inang lo a, December-ah season tawpin, February thla tawpah inkhelh ṭan leh chauh tur a ni.

David Beckham khan MLS-a a khelh lai khan thlasik chawlh hi European club-a loan-a khelhna hun atan a hmang ṭhin a, Son pawh hi hetiang deuh hian, thlasik chawlh laia loan-a chhuak tur anga sawi a awm.

Mahse, Son chuan, "Eng club nen mah kan indawr lo a, chhuak tur anga min sawi an awm a nih chuan, thudik lo an sawi a ni ang. He club hi ka zah em em a, an tana ka khelh chhung chuan loan-in ka chhuak lo ang.

"Thuthang a awm chuan fan-te an lo buai ṭhin tih ka hria a, mahse, ka chhuak dawn lo. Tin, he club player ka nih lai renga club dang lo dawr chu club zah lohnaah ka ngai a ni," a ti.

Son chuan thlasik chawlh chu hahdam a, World Cup 2026 khel tura inbuatsaih nan hman a tum thu a sawi bawk - an ram South Korea chu World Cup khel tur hian an tling tawh a ni.

Kum 33 mi forward hian LA a zawm hnuah match 12 khelin goal 10 a khung tawh a, assist vawi li a nei bawk.