Netherlands hma hun a chiang dawn

World Cup qualifier 2026-ah Netherlands chu zanin dar 1:15 hian an inlan dawn a, Poland khelmualah an lenglut dawn - Dutch team hian zaninah hnehna an chan chuan World Cup ticket an nei fel dawn a, hei vang hian zanin an inkhel tur hian ngaihven a hlawh hle.

Netherlands hian match ruk an khelh tawh aṭanga point 16 neiin, group G-ah hma an hruai mek a, an hnuai chiaha awm Poland ai hian point thumin an sang zawk - match hnih khelh tur a la awm.

Dutch team-in Poland an hneh chuan World Cup ticket an nei dawn tih an hria a, Poland tan beiseina nei turin tlawm a thiang lo thung - hei tak hi zanina ram pahnih intawng tur tinghahhlelhawmtu a ni.

Ronald Koeman enkawl Netherlands an ṭha a, tlarhnungah captain Virgil van Dijk, Inter Milan fullback Denzel Dumfries, Manchester United centre back Matthijs de Ligt, Arsenal right back Jurriën Timber leh Tottenham defender Micky van de Ven te ho an nei.

Midfield-ah ni se, Barcelona midfielder ṭha mi Frenkie de Jong, Manchester City midfielder Tijjani Reijnders leh Liverpool midfielder Ryan Gravenberch te ho an nei a, tlarhmaah Corinthians forward Memphis Depay, Liverpool forward Cody Gakpo leh Aston Villa forward Donyell Malen te ho an nei bawk a, an chhe lo hle.

Netherlands hian tlarhmaah Ajax striker Wout Weghorst chu ko mah se, fitness lamah harsatna a tawh avangin camp a chhuahsan a, a aiah hian season thara Chelsea zawm tur, Ligue 1 club Strasbourg tana khel mek Emanuel Emegha chu koh a ni.

Hetihlai hian Poland tan chuan zanin inkhel tur hi, 'thih leh dam' tia beih a ṭul a, an tlawm a nih chuan direct-a World Cup khelhna chance an neih an bawhpelh dawn tihna a ni a, playoff khel tur pawhin an dinhmun a derthawng sawt ang.

Poland hnuai chiahah hian Finland an awm a, point thum chiahin Polish team hi an phak lo mek - zanin dar 10:30 hian Malta an mikhual dawn a, an chak chuan Finland chak thu hre sain Poland inlan a ṭul dawn a, pressure a sang sawt ang.

Hetihrual hian Poland hi Robert Lewandowski awmna team an nih avangin Netherlands tan zuam sual theih an ni tih a chiang a, Poland captain hi a kum tam tawh mah se, kartawp inkhelah khan Barcelona tan hattrick a la siam!

Hei chauh a ni lo - Poland hian Aston Villa right back Matty Cash, AS Roma centre back Jan Ziółkowski, Inter Milan midfielder Piotr Zieliński leh Atalanta midfielder Nicola Zalewski te ho an kawl a, Netherlands lakah chak tum ngam turin an ṭha tawk.