MPL12 Mimal chawimawina: LM Store mimal lawmman dawngtute

Keeper zinga best player hmasa ber T. Mawia

GIG Motors MPL12-ah mimal chawimawina an sem chho a, a tawp berah best player an puang. Chanmari FC goalkeeper Zothanmawia chu best player atan thlan a ni a, College Veng pa hian a hming an puan laiin mak a ti hle. T. Mawia hi best player nih phu khawpin champion-na kawngah a thawh hlawk a, chutihrualin MPL-ah best player atana best goalkeeper an la thlan ngai loh avangin mak a ti hi thil mak a ni lo.

T. Mawia hian MPL hmasa berah Dinthar FC a champion pui a, MPL7-ah Aizawl FC champion puiin, best goalkeeper a ni tawh bawk. College Veng goalkeeper hian tun season-ah match khat chiah a khel lo a, clean sheet vawi riat neiin goal 12 chiah a chhuah a, goalkeeper ni chung siin semifinal-ah assist pawimawh bik a nei bawk.

Final-ah T. Mawia hian best player ni thei tura elpui bera ngaih Aizawl FC striker Zomuansanga goal khung tur chu ṭha takin a dang a, hei hi Chanmari champion theihna chhan leh best player a nih theihna chhanah a ngaih theih. MPL history-ah best player-ah champion team zinga mi vek thlan a ni.

Record siamtu Zomuana

Aizawl FC-in nomawi chawi ta lo mah se Khawbel tlangval Zomuansanga erawhin chanchin hlu bik a hnutchhiah a, MPL history-a goal khung tam ber niin goal 18 ngawt a khung. Khawbel goal machine hian MPL-a an elpui club pasarih Chanmari FC, MLS FC, Dinthar FC, Saikhamakawn FC, Mizoram Police, Kanan FC leh SYS FC lakah goal a khung vek.

Zomuana hian MPL4-a F. Lalrinpuia (Valpuia) record goal 13 chu goal nga ngawtin a khum a, MPL history-ah hetiang anga ke hmui hi an la awm ngai lo. Valpuia hi Mizoram Police striker a nihna angin hriat hlawh mah se record a siam kumah erawh Aizawl FC tan a khel thung a, AFC-in season tina goal khung thei bik player an chher chhuak ṭhin hi inchhuanna tham a tling.

Aizawl FC forward Zomuana hi hrem vangin ṭum hnih a inlan thei lo zawk a, inlan thei vek phei se chuan tun aia goal tam zawk a khung thei hial ang. Khawbel goal machine hian MPL12-ah match sarih ngawt a zawnin goal a khung a, box chhung leh pawnah striker ṭha bik a nihzia a pholang.

Best Defender Rohmingthanga Aizawl FC

Aizawl FC-in season ṭha tak an hmang a, I League club hi naupang tlang viau mah se Rohmingthanga'n tlarhnung lama a ho ṭhat avangin an khel a puitling hle. Mission Veng tlangval Roa hi season tluanin a khel ṭha a, a phu ang ngeiin best defender chawimawina hlan a ni. Best defender hi foreigner pahnih Emmanuel Chigozie (AFC) leh Juuko Richard Kassaga (AFC) ten an dawng tawh a, Zothanpuia (Thangpuia) chu vawi hnih dawng thei awmchhun niin, Lalrinchhana Tochhawng (Chanmari FC), Lalhlimpuia (BVT), R. Laldinliana (Chhina Veng FC), PC Laldinpuia (Chhinga Veng FC), Lalruatfela (FC Venghnuai), Lalhmunmawia (Mizoram Police) leh Lalchhawnkima (Aizawl FC) ten an dawng tawh bawk.

Nominee dangte
F Lalchhanchhuaha MLS FC
FC Lalhmunmawia Chanmari FC
H Lalrempuia Aizawl FC
Lalhmangaihsanga Dinthar FC

Best Goalkeeper Zothanmawia Chanmari FC

MPL history-ah best goalkeeper dawng thei hi player paruk chauh an la awm a, Chanmari FC goalkeeper Zothanmawia hi best goalkeeper vawi khat aia tam dawng thei pahnihna a ni. MPL ṭantirh season hmasa paliah Lalawmpuia vekin a dawng a, Mizoram Police goalkeeper F. Lalmuanawma'n ṭum thum a dawng tawh bawk. T. Mawia hian tun ṭuma a dawn hma hian MPL7-ah Chhinga Veng tan khelin a dawng tawh bawk. Best keeper chawimawina hi Malsawmdawngzela (BVT FC), Lalremruata (Aizawl FC) leh Vanlalhriatpuia (Aizawl FC) ten an dawng tawh bawk.

Nominee dangte
F Lalmuanawma Mizoram Police FC
Rosangliana MLS FC
RS Lallawmzuala Saikhamkawn FC
Vanlalhriatpuia Aizawl FC

Emerging Player F. Malsawmtluanga Chanmari FC

MPL-ah hian emerging player hi MPL11 aṭangin sem ṭan a ni a, a dawng hmasa ber chu Michael Lalbiaksanga niin Tlangmawi rawlthar hian MPL11-ah Mizoram Police final thlenpuiin, chawimawina hi a dawng. Michael hi tun season-ah Chanmari FC tan a khel tawh thung. MPL12-ah Chanmari defender F. Malsawmtluanga'n emerging player hi a dawng a, Lunglei Zobawk rawlthar hi MPL11-a SYS FC captain a ni. MPL12-ah Sawma hi a inlan tam a, goal chhuah tlem ber Chanmari FC tan defender pawimawh a ni.

Nominee dangte
Francis Malsawmkima Saikhamakawn FC
Isak Lalvenhima Aizawl FC
K. Lalremmuana MLS FC
Laldawngzuala Aizawl FC

Best Forward Zomuansanga Aizawl FC

Aizawl FC striker Zomuansanga'n MPL12-ah goal 18 ngawt a khung a, tun season-ah forward che ṭha hlawm mah se Khawbel tlangval hi best forward chuhpui pha an awm lo. Mizo striker ṭha rual zingah Zomuana hming a chuang reng tawh ang. MPL awm hnua forward ṭha pathum F. Lalrinpuia, Malsawmfela leh MS Dawngliana ten ṭum hnih ṭheuh an dawng tawh a, anni bakah hian H. Lalmuankima (AFC), Isak Vanlalruatfela (AFC), MC Malsawmzuala (Chawnpui FC), Lalrinzuala (AFC) leh Lalbiakdika (AFC) ten an dawng tawh a ni.

Nominee dangte
Freddy Lalrinkima MLS FC
KC Malsawmsanga Chanmari FC
Suanngaihmuana Saikhamakawn FC
Vincent Lalduhawma Aizawl FC

Best Midfielder Lalawmpuia Sailo Aizawl FC

Aizawl FC-in hneh loh nei loin final an thleng a, league winner an nih bakah MPL history-a league round-a point hmu hnem ber leh chak hnem ber an ni a, hemi kawngah hian Lalawmpuia Sailo hi a pawimawh hle. Dinthar tlangval OmOma hi game siamtu ber a ni a, MPL11 final-a goal awmchhun khungtu hian MPL12 final-ah beisei pha lo mah se best midfielder chawimawina erawh a phu takzet. MPL best midfielder hi Aizawl FC captain Alfred Kemah Jaryan-a'n ṭum hnih a dawng a, Mizo zingah vawi hnih dawng thei la awm lo mah se tualchhung football-ah an hming a langsar hlawm. OmOma hma hian Rohmingthanga (FC Kulikawn), Reuben Zosangpuia (Luangmual FC), David Lalrinmuana (AFC), K. Lalṭhathanga (BVT), Lalruatfela Zote (CFC), R. Malsawmtluanga (Chhinga Veng FC), K. Vanlalhriatzuala (Chawnpui FC), H. Lalbiakthanga (Mizoram Police FC) leh Lalthankhuma (Aizawl FC) ten an dawng tawh a ni.

Nominee dangte
Aron Vanlalrinchhana Chanmari FC
Johny Lalremruata Chanmari FC
Kiran Chhetri Saikhamakawn FC
Ricky H Vanlalhriatsanga MLS FC