Arsenal chelhtu Sunderland

A zawna match riat chhung goal an chuah loh hnuah Arsenal chuan an goal an venghim thei ta reng bik lo. Mikel Arteta naute hian Sunderland lakah goal hnih an chhuah a, an mikhualna ramah 2-2 in an inhnehtawk.

Premier League hmahruaitu Arsenal hian point 26 hmuin a chung berah an la awm chhunzawm, nizan khan Manchester City chuan Liverpool an hmachhawn a, an chak a nih chuan Gunners nen an inkar hi point liah an sawrzim ang.

Goal a lut

Gabriel, William Saliba, Jurrien Timber leh Riccardo Calafiori te an din tlar a, an hnunga David Raya a awm bawk chuan an phui ṭha ṭhin. Stadium of Light-ah erawh a phui reng thei ta bik lo.

Chawlhlawk hma hretin Dan Ballard chuan amah vengtu Declan Rice a paltlang a, defender Gabriel-a'n a rawn tihbuai leh hmain Raya dan theih loh tur khawpa nain a pet lut, second half tirah Buyao Saka hmangin an sut leh thung.

Arsenal lamin an nawr a, midfielder Martin Zubimendi-a'n goal bar a pet per dawp a, midang pawhin an hun ṭha an chhawr thei lo. Goal mamawh laiin Leandro Trossard chuan yard 20-a hla aṭangin goal mawi a khung a, an chakpui rinna pawh a lian hman.

Mahse, hun tawp dawnah Gabriel leh Raya ten ball chingfel tur zawk an ti fel lo a, an pahnih inchilh karah Brian Brobbey chuan mawi zetin a bin lut a, goal dang lut zui tawh loin point khatah an lungawi a ngai.

Arteta a lawm lo

Kar laihawlah Champions League an khel a, kartawpah match an neih leh nghal avangin a awlsam lo. Mahse, point thum hmuh theihna tura an chetsual avangin Mikel Arteta a lawm lo, inthlahdah zeuh a pawi thui thei tih a takin an zir chhuak ngei ang.

Arsenal manager Arteta chuan, "Goal khatna kha chu ven a harsa, chumi hnuah goal kan khung a, goal hnihna kan khung belh bakah inkhel kan thunun hneh hle bawk. Box chhungah kan khingpui player an tam a nih chuan tun aia inven uluk a ngai.

"Tun ṭumah kha chuan kan ven turah kan chiang tawk lo deuh tih a lang, tuna kan result hi chuan min tilungngaiin a thinrim thlak," a ti a, a naute khelh danah a lawm tawh lo, a rang thei anga siamṭhat erawh ama mawhphurhna a ni ang.

Gunners hian tun kartawp hian North London Derby khel turin Tottenham an mikhual dawn a, chumi hnuah Bayern Munich nen Champions League khelin Chelsea nen league match an khel zui leh bawk ang, an tan thlasik fiahna hmasa a ni dawn.