Mipuite hmuhnawm tih tur final chu

MPL12 final-ah hian en châkawm lai bik ṭhanem tak awm a, player en bik tur pawh sawi thiam har khawpin en tur a tam. Coach R. Lalruatfela hnuaia Aizawl FC game nghet ṭha tak Chanmariin chelh tum tur hi en a châkawm hle.

Chanmariin goal 18 khung tawhtu Zomuansanga chelh an tum dawn a, Vincent Lalduhawma leh Sawma Tlangte ten an thlawp ṭhat avangin Aizawl FC tlarhma hi ven an harsa dawn. Chutihrualin Chanmari forward KC Malsawmsanga hian match hnuhnung paliah goal khung vekin goal nga a khung a, I Day Football final-a chakna goal khungtu hi Aizawl Fc tan ven uluk a ṭul dawn.

Coach naupang ve ve, inzir peih ve ve inbeihna a ni dawn avangin midfield battle a pawimawh dawn. Aizawl FC midfielder Lalawmpuia Sailo hian MPL11 final-ah goal awmchhun a khung a, OmOma thlawptu tur K. Hriata hi MPL10-ah best midfielder niin Eric Remruatpuia pawhin FC Venghnuai tana khelh laiin final boruak a tem tawh.

Chanmari lamin National Games leh Santosh Trophy final nuam ti taka khel thei Christopher Kamei an kawl thung a, Services captain thlawp tur hian Johny Lalrinchhana, Joel Lalramengmawia, Crespo Vanlalhriatpuia leh Lalnunzira te an awm thei dawn. Aizawl FC anga an inkawp rem tawk lo a nih pawhin theihna erawh a sang tih hriat a ṭha.

Position hrang hrangah team pahnih an intluk tawk a, final hmuhnawm bik a beisei theih ang.