Chanmari FC-in team huaisen MLS an hneh

GIG Motors MPL12-ah Chanmari FC-in final lut turin MLS FC an hneh a, I League club chak dan erawh a awlsam lo. Chanmarians hian first leg-ah 2-0 in hneh mah se second leg-ah MLS khel ṭha a, I League club an buai. Chutihrualin hun tawpah erawh 3-1 in Chanmari an chak a, aggregate-ah phei chuan 5-1 in an chak.

Result thlirin I League club chak chiang mah se khelmuala thil thlen dan erawh result hian a sawifiah lo a, MLS hian hun tawp thlenga Chanmari an tihbuai avangin fak an phu hle.

Ṭantu nei leh nei lo

RG Stadium-ah Chanmari lamin ṭantu an nei lo a, Lawngtlai club-in ṭantu an nei ṭha thung. Lawngtlai ṭantuten first leg ang lo takin second leg-ah an thawm a ring a, an player-te an auh phur bakah Chanmari an au el a, MLS khelh ṭhatna chhan bakah Chanmarians tihsual tamna chhan an ni.

Chutihrualin tun hma Aizawl pawn club MLS hi chuan Chanmari FC ṭantu ngah vanglai kha chu an pha lo a, Lawngtlai club tan phak theih pawh a ni lo. Chanmarians hian final an thlen takah chuan khelmual pawnah an intihphur thar a ṭul a, boruak an neih thar a takzet.

MLS hmuhnawm

Chanmari FC coach Rochhingpuia'n captain Lalrinchhana Tochhawng aiah Champhai rawlthar duhawm Malsawmsanga Renthlei a luhtir a, thilmak tak erawh Sawma hi first leg-ah squad-ah a awm lo. Bench-ah tawnhriat nei ṭha pahnih Rinchhana leh MPL best defender vawi hnih ni tawh Zothanpuia (Thangpuia) te an ṭhu. Match fitness nei ṭha tawk lo Aron Vanlalrinchhana'n bul a ṭan bawk a, Chanmarians hian final lut tawhah an inngai.

Mahse, semifinal hi Chanmarians rin angin a thleng lo. Lawngtlaiin ṭan phat aṭangin na takin an nawr nghal a, Chanmari an talbuai hle. MLS tlarhmaa awm Freddy Lalrinkima, Ngurthanmawia leh C Willis Byhna te an nung ṭha a, goal erawh an keng tel lo thung. First half-ah Chanmari an him hram.

Team ṭha CFC

Chanmari khel ṭha tawk lo mah se goal chance erawh MLS aiin an nei ṭha zawk. First half-ah Aron-a'n goal ruakah a khung lo a, Lalruatsanga'n chance ṭha ṭum hnih a hlah. Mahse, KC Malsawmsanga a, first leg-a goal pahniha a inrawlh ve ve Serchhip tlangval hian minute 73-naah goal hmahruai a rawn khung.

Sawmsanga hian penalty hlawhchhuak zui mah se Ruatsanga penalty pet goalkeeper Lalvanlawma'n (Telawma) a dan avangin nuam sain Chanmari an awm thei lo. Minute 81-naah Ngurthanmawia'n goal ropui a khung a, MLS an phur thar. Mahse, Willis-a'n chance ṭha a hlah hnuah a kuta a ben avangin yellow card vawi hnihna hmuin hnawhchhuah a ni.

Chanmariin player 10-a khel lamah Ruatsanga leh substitute Lalrokima te hmangin goal hnih an khung belh a, second leg-ah 3-1 a chakin aggregate-ah 5-1 in chak mah se injury time-ah chauh rilru hahdam takin an awm. Hei vang hian inkhel hi scoreline aṭanga teh chi a ni lo a, minute 180 thlirin Chanmariin chak phu zawk mah se Lawngtlai club pawhin fak an phu hle.