Mizoram-in Arunachal Pradesh an hneh

Board of Control for Cricket in India hnuaia state hrang hrang inelna sang - Ranji Trophy Plate Group khelh laiah Mizoram chuan Arunachal Pradesh chu innings khat leh run 58-in an hneh.

Inelna hi Ocotober 25-28 chhung khan Gujarat College Cricket Ground-A, Ahmedabad-ah khelh niin Mizoram tan hian Champhai tlangval Lalrempuia chuan wicket riat a la a ni.

Mizoram hi ṭhum vawrah vannei zawkin vawm hmasak an thlang a. 1 Innings-ah Arunachal Pradesh lamin run 187 siamin an out vek. Mizoram tan Lalrempuia'n wicket thum a la a, K. Vanrotlinga leh Bobby Zothansanga te'n wicket hnih ve ve lain, outstation player KC Cariappa leh CA Karthik te'n wicket khat ve ve an la bawk.

Mizoram-in over 115 chhungin run 389 siamin wicket ruk an hloh a, an innings an duhtawk (declared) a ni. Outstation player Armaan Jaffer chuan run 144 a siam a, a vawi khat nana inlan pathum - Sahil Reza (65), F. Vanlalmuanzuala (55*) leh K. Vanrotlinga (25*) te'n an thawhhlawk hle. Captain Joseph Lalthankhuma'n run 46 siamin vice captain Jehu Anderson pawhin run 36 a siam bawk.

2nd Innings-ah Arunachal Pradesh lamin bat ve lehin run 144 chiah siamin an out vek a, 1st Innings nena belhkhawm pawha Mizoram run siam pawh an tlin loh avangin Mizoram chu Innings khat leh run 58-in a chak ta a ni.

1st Innings lama che ṭha tak Lalrempuia'n wicket nga la lehin he match-ah hian wicket riat lai a la a ni. K. Vanrotlinga'n wicket 3 lain KC Cariappa'n wicket 2 a la bawk.

Ranji Trophy Plate Group chu match hnih ṭheuh khelh zawh niin, Mizoram chu table-ah pakhatnaah awmin an match pathumna atan November 1-4 chhung hian Lal Bahadur Shastri Stadium, Anand, Gujarat-ah Sikkim an hmachawn leh ang.

Mizoram team hian nimin khan inelna neihna tur hmun hi an thleng tawh a, ni hnih chhung training an nei leh ang. Sikkim nen an inkhel hnuah Manipur nen an la inhmachhawn leh dawn a ni.