MPL-ah Kanan an kir leh dawn?

Nimin khan MPL13 Playoff first leg khelh a ni a, MPL12-a pasarihna Kanan FC-in MPL Qualifier-a pahnihna Ramhlun North chu 4-0 in an sawp. Ruahman danah chuan November 1, Inrinniah second leg khelh tur a ni a, minute 90 khelh tur la awm mah se MPL-ah Kanan an kir turah a ngaih theih.

RG Stadium-a inkhelah Kananin inkhel an thunun a, MPL khel zo hlim an nih bawk avangin Ramhlun North aiin an fitness a ṭha zawk a, inkhel turin an inpeih zawk. Ramhlun North erawh First Division-ah league winner ni mah se final an khelh zawhah chawlh an nei a, qualifier leh palyoff khel turin an indah dik hman lo.

Samson Ramengmawia kaihhruai Kanan FC-in ṭan phat aṭangin inkhel an thunun a, F. Lallawmkima'n minute 17-naa hmahruaina goal khungin hna a awlsam sawt. Lalthanzuala'n (TZ-a) goal hnih a khung bakah C. Lalthlanawma goal khat a khung bawk. Lawma leh TZ-a te hian MPL12-ah goal nga ve ve an khung thei a, First Division team tan dan rual an ni lo.