Delap-a'n training a zawm - Maresca

Chelsea boss Enzo Maresca chuan hliam vanga chawl mek, a player Liam Delap-a'n club training a zawm leh tawh thu a sawi a, Blues ṭantute tan chuan rimawi a tling ang.

Maresca chuan, "Tun dinhmunah chuan player inhliam tharlam kan nei rih lo. Liam pawhin a vawi khat nan club training a zawm ve leh tawh," a ti a, hetihrual hian zanin dar 7:30-a Sunderland an mikhual hunah erawh a la inlan hman dawn lo.

Chelsea boss chuan, "Sunderland kan mikhual hunah chuan a la inkhel ve thei dawn lo a, mahse, Nilaini zana League Cup khel tura Wolverhampton Wanderers kan lenchilh hunah erawh a inlan thei ang," a ti.

Blues hi striker lei thar tho Joao Pedro chu tun hnaiah beisei a phak lo a, a match hnuhnung pangaah goal emaw assist emaw a nei miah lo - Delap a inhliam bawk si avangin duhthlan tur an nei chau hle.

Kum 19 mi pahnih Marc Guiu leh Tyrique George ten Ajax lakah goal khung mah se, rinrawla neih atan chuan an kum a la nau hret a, Delap-a'n training a zawm leh ta hi Chelsea chu an lawm khawp ang.