MPL13 khel turin Ramthar an tling

Ramthar Veng FC-in Mizoram chhunga football inelna sang ber Mizoram Premier League an khel dawn. Nimin khan RG Stadium-ah MPL13 Qualifier khelh a ni a, First Division champion hian Ramhlun North 4-1 a sawpin MPL khel turin an inpetling.

Kum 2014 aṭanga din ṭan Ramthar Veng FC hi a din tirh aṭangin Vanlalliansanga (Tatea) an la ho char char a, MPL an kai theihna kawngah hmun pawimawh a chang. Tatea chuan, "Halleluiah, Lalpan thil ropui min tihsak e," tiin Pathian vang chauha tun hun thleng theih an nih thu a sawi.

Qualifier chu

MPL13 Qualfiier-ah Ramhlun North leh Ramthar chiah an tel a, heng team pahnih hi ADFA First Division final-a inhmachhawnte tho an ni. Ramhlun North hi Lalrindika Hmar enkawl niin player ṭha an kawl bawk avangin MPL khel tura rin an ni a, mahse First Division final ang thoin Ramthar an chungnung ta zawk.

Nimin inkhelah hian Alex Ramdinthara hmangin minute riatna lekah Ramhlun North-in hma an hruai a, Ramthar an hnual phah lo. Mizoram tan pawha feh chhuak tawh HP Lalremruata corner pet chu Eddi Lalhmangaihzuala'n minute 37-naah a tauh goal.

Minute hnih hnuah First Division-a best player PC Lalruatsanga a rawn inlar zui a, PC-a hian Kanan veng tlangval Aron ZD Lalfakzuala cross chu a tauh lut. Team pahnih inhnehtawk a, player ṭha danglamna a rawn lang. Minute 73-naah Lunglei tlangval HP-a'n mawi zetin a volley lut.

Ramtharin 3-1 a hma an hruai hnuah harsatna an tawk lo a, minute 89-naah SYS chhuak Hnahthial tlangval Stephen C. Malsawmtluanga'n box pawn aṭangin mawi zetin a hlai goal a, Rmathar Veng 4-1 in an chak.

Ramthar chu

Ramthar Veng hian kum 2004-ah CYMA Football-ah an champion a, hemi hnu tla hniam mah se Tatea hoin an rawn tho chhuak leh. Kum 2014 khan Ramthar Veng FC hi din a ni a, Third Division khelin kum 2017 khan final lutin Kanan FC an hneh lo.

Kum 2018-ah Third Division aṭangin an relegate a, hemi kum hian khelh dil lehin playoff aṭanga inpettlingin kum 2019-ah Third Division champion niin Second Division khel turin an inpettling.

Kum 2020-ah Covid-19 vangin tualchhung football khelh theih a ni lo a, kum 2022-ah Second Division-ah an champion a, kum 2023 aṭangin First Division an khel ṭan. Kuminah First Division an champion a, MPL Qualifier-ah champion lehin MPL khel turin an tling a, heng an hlawhtlinna zawng zawnga an coach chu an veng pa Tatea a ni.

Ramthar Veng coach Tatea chuan, "Kan lawm khawp mai a, theihtawp kan chhuah rah a ni a, Pathian vang liau liau a ni. Training tawp ber niah Chite Presbyterian Biak Inah kan ṭawngṭai a, inkhelh hma, halftime leh inkhelh zawhah pawh ṭhingṭhiin kan ṭawngṭai. Pathian hnathawh liau liau a ni," tiin Vanglaini a hrilh.

Coaching staff dangte fak zuiin Tatea chuan, "Team thawhhona a ṭha a, coaching staff-te kan inlungrual. Vanlalchhuanga (asst coach) leh Lalropuia (manager) te nen kan inpawh em em a, tun hun kan thlen theih nan hian kan thawkrim tlang hle," tiin an vai ṭanrual rah a nih thu a sawi. Ramthar Veng hi MPL khel thei team 24-na an ni.