Tlai dar 4:00-ah Aizawl FC Vs Dinthar

I League club Aizawl FC-in league round an thunun a, league winner an nih bakah MPL history-a chak tam ber leh point hmu tam ber record an siam. R. Lalruatfela kaihhruai team hi an khel dan thlirin champion tura rinkai an ni a, mahse knockout-ah erawh an khelh tawhna an chhawm thei dawn lo. Vawiin tlai dar 4:00 hian Aizawl FC-in Dinthar lakah fiahna an hmachhawn ang.

Maimawms hi phase 1-ah khelh ṭha mah se phase 2-ah an che ṭha lo a, semifinal lut tur pawhin inkhel dang result an nghak. Dinthar hi an insiamṭha viau a nih loh chuan Aizawl FC laka mualpho thei an ni a, mahse knockout a nih tawh chuan engpawh a thleng thei thung.

En bik tur Zomuana

Aizawl FC-in league round-ah goal 40 an khung a, Dinthar FC nen ṭum hnih an inkhelh tawhah goal riat an khung. Thil mak tak erawh MPL12-ah goal 16 khungtu Zomuansanga'n Maimawms lakah hian goal a khung miah lo a, Khawbel tlangval tan Dinthar laka goal khung theihna remchang a rawn inhawng.

Khawbel goal machine hian MPL12-ah record a siam a, goal 16 khung tawhin khung belh theihna hun ṭha a la inhawng mek. Zomuana hian hrem vangin round 14-a Saikhamakawn an hneh ṭumin a khel lo a, Dinthar FC an hmachhawn hmasak ṭumah hrem vang thoin a khel lo. Goal 16 hi match 10 aṭanga a khung a ni a, hattrick vawi thum ngawt a siam tawh a ni.

Zomuana hian penalty aṭangin goal khat a khung a, a bak zawng hi chu open play aṭanga a khung vek niin box chhungah a hlauhawm. Goal 14 ngawt hi box chhung aṭanga a khung niin box pawn aṭangin goal khat a khung tawh bawk. Dintharin Zomuana hi an ven uluk a ngai khawp ang.

Midfield trio

Aizawl FC coach R. Lalruatfela'n MPL tawp lamah meuh chuan kil tinah player a rem dik a tih theih a, midfield-ah Lallawmpuia Sailo, K. Vanlalhriatzuala leh Eric Remruatpuia Chhangte te an inkawp rem tawh hle. OmOma hi inelna hmang ṭha bera chhal theih ni mah se match hnuhnung pathumah chuan K. Hriata'n a theihna a pholang tawh a, midfield pahnih zalen taka an khelh theih nan Eric-a veng ṭha hle.

I League club hian midfield inbeihnaah an thunun theih chuan harsatna nei loin Dinthar an hneh theih a rinawm a, mahse Maimawms coach Laldampuia'n Aizawl FC chelh dan tur a ngaihtuah chhuah a ngai dawn. Chanmari an hneh loh ṭumin Dintharin Thangzawmsanga, Isak Vanlalpeka leh Lalremtluanga (Mamatea) te bul an ṭantir a, player theihna nei sang vek ni mah se an la inkawp rem lo. Zawma leh Isak te hian season chawhnu lamah Dinthar an zawm chauh.

Dampuia'n player thlan chauh ni loin player khelh tir danah thutlukna dik a siam a ṭul a, duh thlan tur player erawh a nei tih hriat a ṭha. MPL ṭantirh lama an rinrawl Tetea Sailo leh Melvin Zomuana te bakah Dinthar tlangval Michael K. Lalhriatpuia te thlan theih turin an awm.

En châkawm lai

Dintharin striker tawnhriat nei ṭha Lalkhawpuimawia an kawl a, MS Dawngliana leh R. Laldanmawia te an awm bawk. Heng player ṭha pathum te hi Aizawl FC tana khel tawh vek an ni a, tuna Aizawl FC player-te aiin an hming a lian zawk.

Knockout stage-ah tawnhriat nei ṭha a pawimawh ṭhin a, Dinthar tan Mapuia, Dawngtea leh Danmawia ten an theihna lantir an tum dawn. Chutihrualin mual sir lamah C. Ramnunpuia (Tea Chinzah) a hmuhnawm ṭhin a, Farkawn tlangval hian stage sangah player rintlak nih a tum ang.

Chutihrualin Dinthar hi tlar-hnung hi a phui lo a, goalkeeper Joel B. Lalramchhana'n insiamṭhat a ngai hle. Ramchhana hian a club hlui lakah a theihna lantir a tum dawn a, chutihrualin Chanmari laka a khelh dan thlir chuan bench lamah a ṭhu thei thung.

Aizawl FC tlarhma lamah Zomuana chauh a hlauhawm lo a, mual sira awm Vicent Lalduhawma, Sawma Tlangte leh Laltlanzova te an hlauhawm vek. I League club-in final an khel a nih phei chuan Zozoa hian season li chhung a zawnin final a khel dawn tihna a ni ang.