Arnold-a'n Liverpool hmachhawn thei mai thei

Real Madrid right back Trent Alexander-Arnold chuan malpui hliam vanga a chawlh reng hnuin, ziaawm lam a pan chho ve mek a, English fullback hi a club hlui Liverpool hmachhawn turin a dam hman mai thei niin an sawi.

Kum 27 mi defender hi September 16 khan Champions League-a Marseille nen an inkhelh ṭumin a inhliam a, minute ngana lekah lakchhuah niin, Real hian khatihlai khan kar ruk vel tal a chawlh a ṭul tur thu an sawi.

Real hian November 4 zanah Champions League match khel turin Liverpool hi an lenchilh dawn a, Arnold-a inhliam aṭanga kar sarihna chiah a ni - tunah a inenkawl mek a, dam lam a pan zel bawk avangin Anfield-ah a inlan lo ang tih a sawi theih loh.

Madrid khaw club thuneitu ṭhenkhat chuan, "Beisei phak bakin a hliam a dam chak a, Liverpool nena an inkhel tur hi hliam a neih hnua a match hmasa ber tur a ni thei dawn," an ti a, Anfield-in eng ang takin nge Arnold hi an lo lawm ang, tih chu thil hriat châkawm a ni.

Kum ruk mi lek a nih laia Liverpool academy zawmtu Arnold hian, "Liverpool chhuahsan tura thutlukna siam kha ka hringnuna thutlukna siam harsa ber a ni," tiin a lo sawi tawh a, Reds tan nomawi chawi theih ang chu a chawi vek hman.

Arnold hian Real a pan hnuah inelna hrang hrangah match nga khelin, khelmuala minute a hman zat belhkhawm hi 156 a ni a, a inhliam hma pawhin Liverpool-a a pawimawh ang kha chuan a pawimawh phak chiah lo.

Xabi Alonso enkawl Real Madrid hian league table chung ber luah mekin, La Liga-ah hma an hruai mek a, Pathianni zan dar 12:30-ah league match khel turin Getafe an lenchilh ang.