Nomawi beisei ngam City?

Manchester City-in season liam ta khan Liverpool lakah Premier League nomawi an chân a, Arsenal hnuaiah an awm bawk. Tun season-ah Pep Guardiola hote insiamṭha muang deuh mah se champion zia an lantir ṭan a, City dinhmun dik tak hi zanin dar 7:30-a Everton an hmachhawn hunah a chiang ang.

Toffees pawhin hma an sawn a, kum 2027 thleng atana contract ziak thar goalkeeper Jordan Pickford pawhin, "Hun thim kan hnuchhawn tawh a, tunah chuan team leh club anga kan ṭhan zel a ngai," tiin a sawi a, David Moyes hnuaiah harhtharna an chang mek.

Everton hian match sarihah point 11 hmuin pariatanaah an awm a, FIFA Club World Cup champion Chelsea nen an point hmuh zat inang rengin Man City nen pawh point hnih chiahin an inthlau. Mahse, tuna an chet ṭhat theih nana player pawimawh Jack Grealish an chhawr thei dawn lo.

Premier League handbook-ah loan hmanga khel player-ten anmahni neitu club an hmachhawn thei lo, tih a chuang. Guardiola-a'n Grealish hi loan hmangin chhuahtir mah se Everton ṭantute erawhin hun rei lote chhungin an ngaina nghal a, khel thei chu ni ngat se Moyes pawhin bul ṭan tur zingah a hming a ziah hmasak ber loh pawhin a hma lamah chuan a ziak ngei ang.

Chutihrualin City tan Erling Haaland-a'n goal a khung leh ṭan tawh a, Premier League-ah ringawt goal kua a khung leh der tawh. Haaland hian a vanglai hun a hmang leh mek a, Toffees tan dan a harsa dawn.

Khelmual pawn lamah erawh City tan chanchin duhawm vek a ni lo. Khawthlang media-te chuan City-in dan 115 bawhchhiatna chungchangah thiam loh an chang a nih chuan, financial expert-te chuan an hrem ngei a rinawm thu an sawi. City hi February 2023 daih tawh khan financial dan 115 zet bawhchhiaa puh an ni a, an hrem nat chuan an nomawi chawi tawh thlenga lak kir sak theih an ni ang.