Penalty ka theihnghilh lo - Kane

England captain Harry Kane chuan Qauar World Cup quarterfinal-a penalty a hlah chu a la theihnghilh thei lo a, nakkuma World Cup an khelh leh hunah chuan ṭha zawka inlan theih ngei a tum.

Three Lions leh France ten Qatar World Cup semifinal luh an inchuh a, France lamin 2-1 a hma an hruai mek laiin England hian nihrual theihna remchang an nei, mahse captain Kane chuan penalty a hlah, an chak lo zui - match tir lama a penalty hmasa zawk khung mah se a hnuhnung zawk avangin a lungngai a ni.

Kane chuan, "Ka rilruah hian a riak reng a, a chang phei chuan thil thar ang mai te hian ka hre chhuak leh ṭhin. A hmain tournament pawimawh dang pawh ka lo khel fo tawh, final-a chak lo zawkah pawh ka lo ṭang tawh bawk.

"Mahse, France laka ka penalty hlah kha chu a danglam. Kan ram khan ka chungah rinna an nghat a, mipui ten beiseina sang tak nen min ngaihchan ṭhup laia an beiseina ti thlawntu nih kha a hrehawm takzet.

"Tunah chuan World Cup 2026 khel turin kan tling leh tawh a, kan tihsual leh dik tawk lo laite siamṭhat theihna remchang kan nei dawn, kan hun ṭha bawh pelh kan tum lo ang," tiin a sawi.

England hian Latvia 5-0 a hnehin an dinhmun hi an ti chiang tawh, captain Kane-a'n ram tan goal 76 khung tawhin Three Lions tana goal khung tam a nihna a belhchhah zel a, a la khung belh ngei pawh a rinawm.

Kum 32 mi Kane chuan, "Tuna a lan dan mai chuan ram tan hian inkhelhna hun ka la nei ve thei nual turah ka ngai a, hliam leh harsatna a thleng thut a nih loh chuan sulhnu ṭha zawk hnutchhiah ngei pawh ka tum," tiin a sawi.

Bayern Munich striker hi goal khung chaka tuihal reng a ni a, a taksa dinhmun thlir chuan nakkum World Cup mai bakah a hnu lamah pawh ram tana la inkhel thei tur niin a lang.