Mizoram cricket team inkhel thei rih lo

Cricket Association of Mizoram (CAM) hnuaia senior team te chuan Ranji Trophy 2025-ah Meghalaya hmachhawn tur an ni a, mahse an inkhelna tur Meghalaya Cricket Association Cricket Ground, Shillong chu a ro chian theih loh avangin an la khel ṭan thei lo, ni hnih chhung inkhel thei loin an awm tawh a ni.

Mizoram team manager Kros Lalnunpuia chuan, "Ruah a sur lem lo a, mahse khelmual hmun ṭhankhat lai hi a huh tlat a, match official lamin an endik hnuah inkhelh chiah an ngai lo a, ni hnih chhung chu kan inkhel thei tawh lo.

"Ni li chhung match khelh tur zinga a chanve chu a zo der tawh, a uiawm takzet. Ṭhum vawr pawh a la ni lo a, engtin nge an kalpui zel dawn kan la hre thei mai bik lo," tiin Vanglaini a hrilh.

Mizoram team hian Ranji Trophy atan hian Sihhmuia inbuatsaihna an neih hnuah MGR Academy, Kolkata-ah training an nei tawh bawk. Captain Joseph Lalthankhuma chuan, team an inkhairual ṭhat avangin beisei an neih thu leh, theihtawp an chhuah thu Vanglaini a lo hrilh tawh bawk a ni.

Ranji Trophy-ah Mizoram hi plate group-ah an awm, an match hmasa ber hi Ocotober 15-18 chhung khelh tur niin, chumi hnuah Arunachal Pradesh, Sikkim, Manipur leh Bihar te an la hmachhawn leh dawn a ni.

Mizoram hian kumin chhungin Ranji Trophy bakah Syed Mustaq Ali Trophy leh Vijay Hazare Trophy te pawh khelh tur an nei dawn a, Vijay Hazare Trophy bik hi chu kumin tawp lam leh nakkum tir lamah a inzawma khelh tura ruahman a ni.