Harsa takin Osaka-i a chak

Japan Open khelh laiah Naomi Osaka chuan harsa takin quarterfinal a inhlangkai - Japanese star hian champion lai Suzan Lamens chu a hneh a, vawiin hian Jaqueline Cristian nen semifinal luh inchuhin an intawng zui leh nghal ang.

Nilaini zan Centre Court-a inkhelah, seeded pakhatna Osaka hian Lamens hi 7-6 (8/6), 3-6, 6-2 in a hneh a, an ramah hian kum thum hnua singles match a khelh lehna hmasa a nih avangin tum hma lama a inkhel ang kha chu a phak rih lo.

Set hnuhnung ber an khelh laiin Osaka hi a ke vei lam na vangin enkawl lailawk a ngai a, mahse a inkhel chhunzawm thei. Darkar hnih leh minute 20 an inkhelh hnuah a chungnung ta zawk a ni.

Grand Slam vawi nga champion tawh Osaka chuan, "Inkhel harsa leh hautak tak chu a ni a, hetiang hunah hian rilru paukhauh a ngai zual hle ṭhin, chak lo thei dinhmuna kan din lai tak hi thapui thawh a ngai hun chu a ni.

"Tunah hian a tawp ka thleng ta tihna erawh a la ni lo, tun aia match hautak zawk khel tur hian rilru leh taksa a inbuatsaih leh nghal a ngai," tiin a sawi a, an ramah champion ngei a tum.

Osaka hi player ṭha leh theihna nei sang a ni a, sulhnu pawh a nei ṭha. Mahse, fa a neih hnuah erawh ngai a la awh leh lo a, kum 28 mi chauh a la nih avangin tun hma lama a ropuina ang kha neih let theih a la beisei.