Carlos Alcaraz a insawifiah

Mipa tennis number 1 Carlos Alcaraz chuan 'Six Kings Slam Exhibition' an khelh chungchang a sawifiah a, tournament tam tak karah pawh mipui hmuhnawm tih tur chhawpchhuah chu an thil tum a nih thu a sawi.

Tun kar tawp hian Six Kings Slam Exhibition hi khelh zawh a ni dawn a, tennis season rei leh tournament kelh tur an ngah em em laia Riyadh, Saudi Arabia-a match an khel hian sawisel a hlawh a, mi tam tak chuan sum duh vang niin an sawisel.

Champion hian dollar maktaduai 4.5 an dawng phak daih dawn a, ni thum chhung leka hlawh chhuah atan chuan a tam takzet. Kuminah hian - Alcaraz, Jannik Sinner, Novak Djokovic, Alexander Zverev, Taylor Fritz leh Stefanos Tsitsipas te an inlan.

Spanish star Alcaraz chuan, "Player ṭhenkhat chuan kan calendar neih sa hi an sawisel fo a, chawlhkar hnih dan lek leka tournament khelh tur a awm chhoh reng avangin a harsa ve bawk. Exhibition sawisel an awm a nih pawhin an demawm hran lo.

"Chutihrualin, tun ṭuma kan khelh ang hi chu a danglam, hun rei tak chhung taksa leh rilru hah takin tournament kan khel a, a chang chuan ni 16 bawr vel te kan inkhel hial ṭhin, hei chu kalphung pangngai a ni.

"Chutiang karah chuan ni thum vel leh nuam ti leh engthawl taka kan han inkhel ve zauh kha a pawina a awm hran loin ka hria, a chang chuan thil hi a tawngtu dinhmuna indah ve chhin a ngaih chang hi a awm ṭhin," tiin a sawi.

Alcaraz hian season a hmang ṭha a, world ranking lamah pawh dinhmun sang ber a luah. Spanish star hnuaiah hian Jannik Sinner a awm a, anni pahnih hian season hmasa ang bawk khan kuminah pawh Grand Slam pali chu an insem vek a ni.