Barca tan Frenkie de Jong a rinawm

Khawvela midfielder ṭha ber pawl Frenkie de Jong chuan Barcelona tana khelh chhunzawm turin rinawmna thu a tiam a, Catalan club-ah hian kum 2029 thleng khel turin contract thar a ziak.

Kum 28 mi midfielder hi contract a neih lai ang chuan June 2026 thleng bak Nou Camp-ah hun a nei tawh lo a, mahse, kum thum dang Barcelona-a cham chhunzawm a thlang ta a ni.

Barcelona hian De Jong hi chelh tuma an dawrna a rei tawh hle. Kum 2024 khan be ṭan tawhin, Dutch midfielder hian a chhang lawk lo. Kumin March thla khan an dawr nawn leh a, tunah chuan an inrem thei ta.

De Jong hian tun season inelna hrang hrangah match riat khelin goal khat a khung a, assist vawi thum a nei - season hmasa khan inelna hrang hrangah match 46 khelin, goal hnih leh assist vawi hnih a nei a, league nomawi an chawi theih nana player ṭangkai a ni.

Kum 28 mi De Jong hian kum 2019 nipui lai khan Ajax chhuahsanin, Barcelona hi euro maktaduai 86-in a zawm a, mahse, Catalan club hi sumah an talbuai zui em avangin kum 2022 khan Dutch midfielder hi an zuar hial.

Khatihlai khan Manchester United chuan €75mtd-in an dawr a, Barca hian an pawm thlap. Mahse, De Jong ber hian chhuah a duh loh avangin Barca-ah a cham zui a, tunah chuan player pawimawh niin, Catalan club lamin an chelh ta zawk.

De Jong hian Barca tana a khelh chhungin La Liga nomawi pahnih, Copa del Rey leh Spanish Super Cup (2) nomawi a chawi tawh a, inelna hrang hrangah match 267 khela goal 19 khungin, assist vawi 24 a nei tawh bawk.