Sweden-in coach Tomasson an ban

Football khawvela coach la ban ngai miah lo ram zinga mi Sweden chuan a vawi khat nan an ram coach Jon Dahl Tomasson an ban a, Danish coach an ban chhan hi World Cup qualifier-a beisei ang result an neih theih loh vang a ni.

Sweden hian World Cup qualifier match li an khelh tawhah chak an la nei lo. Match hmasa berah Slovenia chu 2-2 a inhnehtawkpuiin, Kosovo (2-0), Switzerland (2-0) leh Kosovo (1-0) te ngam loin an tlawm zui.

Swedish Football Association chairman Simon Astrom chuan, "Kan beisei ang result kan neih theih loh avangin hetianga thutlukna siam mai hi a ngai ta a, coach thar kaihhruaina hnuaia khelh kan mamawh niin kan hria a ni," a ti.

Liverpool striker Alexander Isak leh Arsenal striker Viktor Gyokeres neitu Sweden hian point khat chiah neiin, hmahruaitu Switzerland chuan match ruk khelh turah match li khel tawhin, point 10 an nei tawh thung.

Europe-a World Cup qualifier-ah hian group tina hmahruaitu ṭheuh chu World Cup khel tur hian an tling a, pahnihnaten playoff hmangin chance an la nei leh dawn bawk.

Sweden vanneihna erawh pahnihna an nih phak loh pawhin, 2024-25 Nations League-a an group hmahruaitu an nih avangin playoff an la khel thei dawn a, coach thar kaihhruaina hnuaia World Cup inpetkai hram an beisei ang.

Hetiang boruak karah hian West Ham ban tak Graham Potter chuan Sweden enkawl a hreh loh thu a sawi. Chelsea coach pawh lo ni tawh Potter hian Swedish club Östersund aṭanga a professional coaching career ṭanin, January 2011 - June 2018 inkar kha a lo enkawl tawh.