Europe club lianten substitute paruk an duh

Kar hmasa khan European football-a club langsar hotu ṭhenkhat chu an inhmukhawm a, player-te hah lutuk tur ven nan match khata substitution vawi ruk siam theih chungchang an sawi ho.

Kar hmasa khan Rome khawpuiah European Football Clubs (EFC) general assembly neih a ni a, official agenda-ah match khata substitute paruk awm theih chungchang hi sawi ni chiah lo mah se, hei hi remchangah lain, club ṭhenkhatten sawi hona an nei.

European club inrawn ho zingah hian Premier League club langsar Manchester City, Liverpool, Manchester United, Arsenal leh Nottingham Forest te pawh an tel a, an duh dan chuan squad-a player 25 awm thei chu 28-ah tisangin, substitution panga awm thei chu paruka tihsan a ni.

May 2020 khan Premier League bikah chuan substitute panga hman theih turin tih a ni a, mahse, 2020-21 season-ah khan pathumah tlakhniam tir leh a ni. Mahse, 2022-23 season-ah panga hman turin vote leh a ni.

Hetihrual hian inkhelh laia lu lama inhliam player an awm chuan, substitution hman zawh tawh pawh ni se, hman nawn theih tura tih a ni bawk.

Substitution paruk siam theih hi tihhlawhtlin a ni kher ang em, sawi theih a ni lo a, Europe club langsarte hian an duhdan an lo sawi lawk a ni ber - hman a nih dawn chuan football dan siamtu International Football Association Board (IFAB) lamin an pawm a ngai dawn a ni.

Substitution siam tam a, squad tihchhah hi club lamin player inhliam venna turah ngai mah se, Professional Footballers' Association (PFA) lam chuan hei hian a ven viau an beisei chuang lo niin an sawi.

Player-te hi inkhel lo mah se, matchday squad-a an awm tho chuan zin chauh leh training zawng zawng an tih a ngai dawn tho a, danglamna a thlen tam an ring lo.

June thla khan UEFA, EFC, FIFPRO Europe leh European league-te chuan player-te inhliam dan leh a kaihhnawih zirchian hna an thawk a, thla hmasa khan FIFPRO chuan 2024-25 season-a player te zin tam dan leh thawhrim dan an zirchianna chu an tlangzarh bawk.