Gravenberch dinhmun a chiang lo

Liverpool ṭantuten chanchin lawmawm lo hriat tur an nei a, an midfielder pawimawh Ryan Gravenberch chu kartawpa Manchester United hmachhawn turin a inlan thei dawn em a chiang lo.

Dutch midfielder hi Pathianni zan khan Netherlands tan inlanin, Finland a hmachhawn a, mahse, hliam tenau avangin second half-ah lakchhuah a ngai.

Kum 23 mi midfielder inhliamna hi hliam tenau tia sawi a nih rualin, he thu buatsaih a nih lai hian a dinhmun chiang taka sawi theih a awm rih lo.

Netherlands manager Ronald Koeman chuan, "Ryan hian a malpuiah nuam lo deuh a neih thu a sawi a, chutiang a nih takah chuan risk la duh loin kan la chhuak ta a ni," a ti.

Gravenberch chuan, "Season rei tak kan hmang dawn a, fitness lam thil a ni a, invenna a ni ber," a ti a, mahse, a dinhmun hi la enchian mek a nih avangin Liverpool fan-te ngaih a ngam lo.

Liverpool hian tun hnaiah beisei angin result an nei ṭha thei lo a, inelna hrang hranga an match hnuhnung pathumah an tlawm vek!

Crystal Palace laka 1-0 a an tlawm hnuin, Galatasaray (1-0) leh Chelsea (2-1) an ngam lo zui a, Premier League-a hmahruaitu an nihna pawh hlohin, Arsenal-in hma an hruai mek tawh.

Reds hian October 19, Pathianni zanah league match khel turin United an mikhual zui dawn a, Red Devils hian tun season-ah beisei phak lo mah se, United an nih miau avangin Liverpool tan ngaihngam taka awm chi a ni lo.

Arne Slot-a enkawl team hian hliam vangin first choice keeper Alisson an chhawr thei dawn lo chiang a, Chelsea laka si ban nghaktu Giorgi Mamardashvili-a'n goal a veng leh ang.

Hetihlai hian Japanese midfielder Wataru Endo leh France centre back Ibrahima Konate te chu international break-ah hliam vangin an ram squad aṭangin an inhnukdawk bawk - Pathianni zanah dam hman tak ang maw? tih chu zawhna awm mek a ni.