World Cup khel turin England an tling

England chu World Cuop 2026 khel turin an inpet tling ta - Three Lions hian Thawhlehni zan khan Latvia chu 5-0 in an sawp a, match ruk an khelh chinah hnehna an chang fai vek.

Thomas Tuchel-a naute hian an khingpui an la hneh vek a, point 18 hmu tawhin anmahni hnaih bertu Albania aiin point sarihin an hmu hnem tawh zawk a, khelh hmabak match pahnih la nei mah se midang tan umphak theih an ni tawh lo.

Daugavas Stadiona-a inkhelah, ram pahnih an inthlau hle. England hian khawvel huapa hriat hlawh hlir an khelh tir theih laiin, an khingpui erawh world number 137 an ni thung a, an inkhel tawk lo takzet a ni.

England tan hian captain Harry Kane chuan a hna ngai thawk chhunzawmin goal hnih a khung. Newcastle United forward Anthony Gordon leh Eberechi Eze ten an khung bakah Latvia defender Maksims Tonisevs chuan anmahni lamah a ti lut palh bawk.

England coach Thomas Tuchel chuan, "Latvia rama inkhel ni mah ila a hmuna ṭantu kan nei ṭha em em a, a bik takin lawm avanga fiamthu leh min fak derna te avangin a nuam pawh ka ti, fans lamin kan hming an lam rual dual dual a nih chuan lawmna tur a ni ṭhin.

"Min thlawp tute thawm a ṭha em em a, qualifying kan khelh lai ang ngei hian America kan pan hunah pawh hetiang bawk hian min thlawp ṭhat ka beisei. Thil tum sang leh ropui tak kan nei a, chumi tih hlawhtlin tuma kawng dik zawh chu thil nuam tak a ni bawk," a ti.

England hian Mizoram buai ṭan kum (1966) khan World Cup nomawi an chawi a, a hnu lamah an la champion leh lo. World Cup 2026 champion nih ngei tumin hma an la mek, coach Tuchel leh a naute chungah mawhphurhna a sang khawp ang.