Ram tana assist nei tam ber Messi

Lionel Messi chuan nimin zing khan assist vawi hnih a nei a, Argentina captain hi ram tana ṭhiante goal khung tur siamsak tam ber a ni ta, record hmasa chelhtu Neymar chu a khum nghal a ni.

Messi hian Puerto Rico an hmachhawn ṭumin Gonzalo Montiel leh Lautaro Martínez te khung tur a siamsak a, ram tana a feh chhuahna hoah a ṭhiante goal khung tur vawi 60 a siamsak tling - Brazilian star Neymar (59 assist) a khum.

Argentina inkhelhna tur hi Chicago aṭangin Inter Miami khelmual Chase Stadium-ah sawn a ni a, an inkhelhna hmun hi Messi tan thil thar a ni lo, a club khelh mekna a nih avangin a tlangnel, a team hi 6-0 in hnehna a chanpui a ni.

World champion Argentina tan hian Alexis Mac Allister-a'n goal hnih a khung a, Montiel leh Martinez te bakah hian Steven Echevarria chuan anmahni lamah a ti lut bawk a, nuamsa takin hnehna an chang.

Argentina tan hian coach Lional Scaloni-a'n a sawi lawk tawh ang ngeiin player thar an inlan nual, player pali - Jose Manuel Lopez, Aníbal Moreno, Lautaro Rivero leh Facundo Cambeses te chuan ram tana an match hmasa ber an khel.

Scaloni chuan, "Ram tan a ni emaw, club tan a ni emaw pawh ni se match hmasa ber hi chu a awlsam ngai lo. Argentina jersey ha tlak chin an nih tawh chuan an ṭha vek a, tun ṭuma mi te pawhin an mawhphruhna an hlen chhuak ṭha vek," a ti.

Argentina hi World Cup 2026 khel turin an tling chiang tawh a, nakkuma football inelna lian hmachhawn turin tunah chuan a khat tawkin friendly match an khel chho ang, an champion ṭum ang khan team nghet tak neih tumin hma an la mek zel a ni.