Zaninah Police Vs Aizawl FC

Mizoram Police-in ni khat chauh hahdamna hun an nei a, zanin dar 7:00 hian GIG Motors MPL12-ah league winner Aizawl FC an hmachhawn nghal dawn. Round hmasa bera an inhmachhawn ṭum khan Aizawl FC hian 5-0 ngawtin an sawp a, I Day Football-ah hetiang zat bawk hian an sawp avangin I League club hi chak zawk tura rinkai an ni.

Mahse, coach BS-a Colney rawn let hnuah Police game-ah hmasawnna hmuh tur a awm a, team tum châkawm an ni tawh lo. Season tawp boruak sangah Police-in an zia an chhuah ṭan a, tawnhriat nei ṭha F. Lalrinpuia, R. Malsawmtluanga leh Lalbiakhlua (Biaktea) te ho an la rintlak hle. Aizawl FC laka an tlawm pahnih hi zing leh chhun a ni a, tun ṭumah erawh zanah an khel dawn a, Police tan chanchin lawmawm a ni ang.

Chutihrualin Aizawl FC erawh MPL12-a khelh dan nghet nei awmchhun ang hiala sawi theih an ni a, coaching staff-te hnathawh a fakawm hle. I League club hian season liam ta khan hneh loh an tawng lo a, tun season-ah pawh an la tawm lo.

R. Lalruatfela hote hian Police laka hnehna an chang a nih chuan point 35 an hmu ang a, season khata point hmu tam ber an nih rual dawn a, round 14-ah record thar an siam thei ang. Aizawl FC striker Zomuansanga'n goal 13 a khung tawh a, season khata record thar siam turin goal khat dang a la mamawh a, Police lakah hian hattrick a siam tawh a ni.