Semifinal-ah Dinthar nge MLS FC?

GIG Motors MPL12-ah round hnih chauh khelh tur a awm tawh a, semifinal khel tur phei chu round tawp berah chauh a chiang dawn. Vawiin tlai dar 3:00-ah Dinthar FC leh MLS FC te an inkhel dawn a, semifinal inkhel tur zawnna a ni thei ang.

Dinthar hi pathumnaah awm mek mah se match tawp berah an hmelma leh semifinal lut tawh Chanmari FC an hmachhawn dawn avangin an dinhmun hi a la derthawng hle. Vawiin tlaia Lawngtlai club hi an hneh lo a nih chuan MPL2 round 14-naa thil thleng ang kha a thleng nawn thei a, Chanmariin Dinthar hi an 'bye bye' nawn a nih chuan an rilru a na thar khawp ang.

Round tawp ber pressure tiziaawm turin MLS FC hi an hneh a ngai a, an match hnuhnung bera Aizawl FC an hneh loh avangin pressure an ngah phah. Maimawms coach Laldampuia chuan, "Chanmari nen kan intum hma hian semifinal luh fel kan tum," tiin Vanglaini a hrilh a, MLS hneh ngei kan tum, a tihna a ni thei ang.

Aizawl FC an hmachhawn ṭumin hrem vangin MS Dawngliana an chhawr thei lo a, damlohna avangin R. Laldanmawia an chhawr thei lo bawk. Dawngtea leh Danmawia te thlak zo an awm loh avangin I League club lakah ṭum dang an pha lo a, MLS lakah Dinthar ṭha zawk a hmuh theih ang.

MLS FC hian match hnuhnung berah SYS FC lakah point thum an hlawh chhuak a, 4-0 ngawtin an chak. Lawngtlai club tan Ngurthanmawia'n goal hnih a khung a, an striker pawimawh Freddy Lalrinkima'n penalty aṭanga a khung bawk avangin inrintawkna an ngah sawt dawn.

Team pahnih hi round hmasa berah khan an inhmachhawn a, Dinthar 3-2 in chak mah se team pahnih an inhnehtawk a, Maimawms defender Lalhmangaihsanga chu player of the match-a thlan a ni. MLS hian coach thar Lalruatliana Sailo (Tawia) hnuaiah chak hmel an hmu ta a, an tum ram semifnal thleng turin Dinthar lakah point thum hlawhchhuah an tum ang.