Saikhamakawn hnehin Chanmariin semifinal an lut

GIG Motors MPL12-ah Chanmari FC-in nimin khan Saikhamakawn 2-0 in an hneh a, match 12 aṭanga point 24 hmuin semifinal an lut. Lalsangzuala Hmar enkawl SKK erawh an dinhmun a ṭha lo - panganaah an awm mek a, semifinal lut lo thei dinhmunah an ding.

RG Stadium-a inkhelah hian SKK defender Joshua Vanlalrinliana Ngente-in an lamah a tilut a, substitute Lalpekhlua'n Chanmari goal hnihna a khung. Chanmarians tan an player thar Christopher Kamei a inlan a, SKK lakah Rochhingpuia hoten hnehna chang mah se football hmuhnawm an chhawp chhuak lo.

Thutlukna danglam

Chanmariin hrem vangin Johny Lalrinchhana leh Joel Lalramengmawia te hrem vangin an chhawr thei lo a, player ṭha bik Services captain Christo bul an ṭantir nghal. Coach Chhinga'n tlarhmaah Kanan laka goal khungtu Singte George Kom bul a ṭantir a, Chanmari khelh danah thil danglam hmuh tur a awm lo.

Saikhamakawn erawhin goal kua khung tawhtu Suanngaihmuana bench-ah an dah a, hliam vangin Lalnunzira Sailo an chhawr thei lo. Midfield-ah JH Remlala rawn kir mahse SKK an kim lo a, right back-ah Zonunmawia an rawn hmang bawk. Coach tawnhriat nei ṭha Lalsangzuala Hmar player thlan dan hriatthiam a har hle.

Beisei pha lo

Tlai dar 3:00-ah ni a la sa a, team pahnih an talbuai ve ve a, first half-ah a hmuhnawm loh. Chanmariin an player thar Christo an chhawr thiam tawk lo a, a theihna lan ṭum chu awm ve bawk mah se inkhel tidanglam khawpin a khel ṭha lo. SKK lam pawh an khel ṭha chuang lo a, first half a hmuhnawm loh.

Second half-ah Chhinga'n George Kom aiah Lalruatsanga a rawn luhtir a, Serchhip tlangval hian inkhel kal hmang a thlak danglam. Mual vei lamah Sawmsanga a nung ṭha a, Zonuna'n a veng hneh lo. Minute 53-naah Sawmsanga'n ṭha zeta la lutin, a cross luh chu SKK defender JoJo-a'n an lamah a tlawh lut a, goalkeeper RS Lallawmzuala tan dan ngaihna a awm lo.

Goal luh hnuah inkhel a nung sawt a, SKK-in goal beiseiin Amuana bench aṭangin an luhtir. Mahse, Zira awm lohna SKK inkhel a dik thei lo a, chance an insiam thei chuang lo. Chanmari erawh hun tawp lamah an goal bawh a na lehzual a, Ruatsanga pass Sawmsanga'n goal ruakah a khung lo. Minute 89-naah erawh Sawmsanga ball pek chu Peka'n la lutin, Bawngkawn tlangval hian ṭha zetin a pet lut a, Chanmari 2-0 in an chak.

MPL a nung

MPL-ah Aizawl FC leh Chanmari FC ten semifinal an lut a; Dinthar, MLS FC leh Saikhamakawn FC ten hmun ruak pahnih an inchuh dawn. Lalsangzuala Hmar hote hian Kanan FC leh Aizawl FC an hmachhawn dawn a, hmabak a la harsa.

Chutihrualin Dinthar leh MLS te hi an la inkhel dawn a, hei hi SKK tan lehpelna remchang a ni ang. Dintharin match tawp berah Chanmari an la hmachhawn dawn a, MLS-in Mizoram Police FC an hmachhawn dawn a, MPL boruak tawp lam a 'hot' dawn.