Hlawhtling takin Marquez an zai

Marc Marquez chu a dar (shoulder) ding lam hliam zai a ni a, an zai hlawhtling hle niin a team Ducati chuan an sawi - a chawlh chen tur erawh an la sawi chiang thei lo thung.

Spanish rider hian a vawi sarih nan MotoGP title a la chiang leh tawh, bike intlansiakna sang berah hian Valentino Rossi nen champion tam ber an ni mek, kumina tlan hmabak an la neih hoah hahdam zawkin a inlan thei tawh ang.

Ducati chuan thuchhuah siamin, "Marc Marquez-a hliam chu Ruber Internacional Hospital, Madrid, Spain-ah hlawhtling taka zai a ni. Lombok-a a chetsualna avang khan zai hi a ngai a, tunah chuan a rang thei ang bera ngai a awh leh theih nan enkawl a ni," an ti.

A tirah chuan Marquez hi tun season chhungin a inlan hman tawh lo tura ngaih a ni a, tun thla chhunga tlan tur Australia leh Malaysian Grand Prix-ah chuan a inlan dawn lo; Portugal leh Valecia-ah te erawh a inlan theih beisei a ni thung.

Kum 32 mi Marquez hi hliam vangin a buai fo a, kum 2020 season ṭan dawn khan chesualin a ban dinglam ruh a tliak, hemi vang hian hun rei tak chhung chu ngai a awh lo, kuminah ṭha taka rawn tlanin a champion leh nghal a ni.

Tun kar tawpa tlan tur Australian MotoGP-ah chuan Marquez aiin test rider Michele Pirro chuan Ducati bike a khelh dawn a, a hmun ruak hnawh khah erawh thil awlsam a ni lo ang.