Mizoram cricket team hmaah Meghalaya

Cricket Association of Mizoram (CAM) hnuaia senior team te chuan vawiin chawhma dar 9:30 hian Ranji Trophy 2025 an khel ṭan dawn, an match hmasa ber atan Meghalaya chu Meghalaya Cricket Association Cricket Ground, Shillong-ah an hmachhawn dawn a ni.

Mizoram hian Ranji Trophy atan hian Sihhmuia inbuatsaihna an neih hnuah MGR Academy, Kolkata-ah training an nei tawh bawk. Captain Joseph Lalthankhuma chuan, team an inkhairual ṭhat avangin beisei an neih thu leh, theihtawp an chhuah thu Vanglaini a lo hrilh tawh a ni.

Ranji Trophy-ah Mizoram hi plate group-ah an awm, an match hmasa ber hi Ocotober 15-18 chhung khelh tur niin, chumi hnuah Arunachal Pradesh, Sikkim, Manipur leh Bihar te an la hmachhawn leh dawn a ni.

Mizoram hian kumin chhungin Ranji Trophy bakah Syed Mustaq Ali Trophy leh Vijay Hazare Trophy te pawh khelh tur an nei dawn a, Vijay Hazare Trophy bik hi chu kumin tawp lam leh nakkum tir lamah a inzawma khelh tura ruahman a ni.