Ayush & Terina telna India U23 tlawm lo

Indonesia-a friendly match khel tura zin India chuan Indonesia nen match vawi hnih khelin, tlawm an nei lo.

Ayush Chhetri leh Lalrinliana Hnamte telna Blue Tigers hian an match hmasa zawkah 2-1 in hnehna an chang a, match hnihnaah 1-1 in an inhnehtawk thung.

Jakarta khawpuia an inkhel hmasa zawkah India tan Suhail Bhat chuan goal hnih khungin, Indonesia tana Dony Tri Pamungkas goal khungin awmzia a nei phak lo. October 10, Zirtawpni khan match hmasa zawk hi khelh a ni a, October 13 khan a vawi hnih nan an intawng.

An vawi hnih intawnnaah hian India U23 tan Korou Singh chuan goal hmahruai khungin, Dony Tri Pamungkas-a'n si phurh a sut a, 1-1 in inkhel an ṭin.

Match pahnihah hian Ayush leh Terina ten inkhel bul an ṭan ve ve a, match hmasa zawkah Ayush-a'n captain armband a hreng. Dinthar tlangval chuan, "Eng level-ah pawh India tana captain armband ka hren hmasak ber a ni.

"Inkhelh dawnah khan coach-in captain ka nih tur thu min hrilh thut. Ni li chhungin match hnih ka khel tluan thei bawk a, ka lawm khawp mai," tiin Vanglaini a hrilh.

Chennaiyin midfielder Terina chuan, "Result ṭha tak niah ka ngai a, match hmasa zawkah mimal takin ka khel ṭha tawk lo ka inti a, a pumpui thlir erawhin ka lawm viau," tiin Vanglaini a hrilh ve bawk.

India U23-te hi nimin khan an lo kir lehnghal a, Ayush hian FC Goa training zawm zuiin, Terina pawh Chennaiyin tana Super Cup khel turin Goa lam a pan zui.