Ju-Jitsu-ah Mizo fighter-ten medal la

Mizo fighter pahnih Lalhmangaihzuala leh Lalnunsanga te chuan National Ju-Jitsu championship 2025 neih zawh takah gold medal an hlawh chhuak ve ve.

Saharanpur, Uttar Pradesh-a National Ju-Jitsu championship 2025-ah Mizo fighter pahnih hi Ju-Jitsu Association of Mizoram (JAM) tirhin an tel a, Republic Veng tlangval Hmangaihzuala hian 62 kg division Contact Jiu-Jitsu (MMA rules) ah inelna hmachhawnin, gold medal a la.

October 9 aṭang khan inelna hi neih ṭan niin, October 13 thleng a awh a, Chawnpui veng tlangval Nunsanga chuan 69 kg-ah inelna hmachhawnin, Contact Jiu-Jitsu (MMA rules) ah gold a la a, Ne-Waza (BJJ) ah silver medal a la bawk.

He inelna hi December-a neih tur world championship-ah India ai awh tur thlanna a ni nghal a, Hmangaihzuala leh Nunsanga te hian medal an lak avangin Thailand-ah India ai an awh dawn a ni.

JAM president Roṭhuamliana chuan, "Fighter-te taimakna leh coach-te inpekna avanga tun dinhmun thleng kan ni a, sorkar pawhin theihtawpa hma min lakpui a, Mizoram State Sports Council-in he infiamna hi a pawm ve vat kan beisei," tiin a sawi.