Hojlund-a'n goal khung leh ta

Denmark-in World Cup khelh an tum tih pholangin, hnehna an chang leh ta a, khualmualah Belarus chu 6-0 in sawp - Danish striker Rasmus Hojlund chuan Manchester United a chhuahsan hnua a 'form' chu international football-ah pawh a chhawm nung zel.

Napoli-a loan-a khel mek striker hian goal hnih a khung a, MLS club San Diego FC midfielder Anders Dreyer chuan goal hnih khung ve bawkin, Porto midfielder Victor Froholdt leh Manchester United wing back Patrick Dorgu ten goal khat ve ve an khung bawk.

Denmark-in hnehna an chan rualin, uang thei erawh an ni bik lo a, an hnuai chiaha awm Scotland nen an point hmuh zat a inang - Tartan Army hian an mikhual Greece chu 3-1 in an hneh.

Scotland tan hian Ryan Christie, Lewis Ferguson leh Lyndon Dykes ten goal khat ṭheuh an khung a, Greece tana Kostas Tsimikas goal khungin awmzia a nei phak lo.

Pathianni zanah Scotland hi inlan zui lehin, zan dar 9:30-ah Belarus an mikhual ang a, Denmark hian Pathianni zan dar 12:15-ah Greece an mikhual ve leh thung ang.