Teirei peihna - Mizoram hlawhtlinna!

Mizoram Badminton Association-in tun hnaia an hlawhtlinna ziakin dah dawn se, tlar dul tham a awm - he an hlawhtlinna nei tura an zinkawng erawh a awlsam bik lo.

Mizoram Badminton Association (MBA) secretary general Dr. K. Vanlaldinpuia chuan, "Tata Trusts nena kan thawhhona hi kan hlawhtlin bul inṭanna chu a ni a, a tirah chuan hlawhtlin loh mai hlauhthawnna leh rinhlelhna a awm.

"Mahse, kum li kum nga vel kan han khel chho a, result a rawn awm ṭan a, kan lawm takzet. Tei rei peih hi a lo ngai a ni," a ti a, India badminton legend Pullela Gopichand chuan, "Kan academy hi kum 2004 aṭangin kan lo kalpui tawh a, naupang tam tak training kan lo pe tawh.

"Mahse, Mizote tluka hmasawn chak an awm lo. Theihna in nei a ni," a ti thlawt a, badminton-a Mizoramin hma a sawn zel theih nan puih zel pawh a tum - result a awm miau a!

MBA secretary Mapuia chuan, "Tun championship-ah pawh team-a tel ni satliah loin, kan nauten hmun pawimawh an chang zel a, kan naute hi top level player tak tak an ni. Tata Trust pawhin min thawhpui zel an duh a ni," a ti a, Tata Trust vanga tun dinhmun thleng an nih thu a sawi bawk.

Mapuia chuan sawi zawmin, "Mizoram State Sports Council (MSSC) in min pui ṭha em em a, kan mamawhna apiangah an awm zel. Kan sports minister Lalnghinglova Hmar chungah lawmthu kan sawi bawk.

"Kan duhnate a ngaithla a ni mai lo a, min phurpui a, a takin min bawhzui sak nghal zel a ni. Mipuiin min thlawp ṭha a, sports association dang pawhin min duhsak em em zel," tiin Vanglaini a hrilh.

Mapuia chuan an hlawhtlinna bul ber erawh Pathian a nih thu sawiin, "Kan naute hi Pathian ring em em an ni a, engtiklai pawha ṭawngṭai ṭhin an nihna hi an hlawhtlin bul inṭanna a ni.

"National media thlengin min rawn ngaihven phah a, Mizoram hmasawnna hi mak an ti a ni," a ti - Mizo naupangte avangin Mizoram hming a mawi a, chutihrual chuan tun hi a bul ṭanna chauh a la ni tih theihnghilh loh a ṭha.