PSG chelhtu Mbappe nau Ethan

Pathianni zan khan Ligue 1-ah PSG leh Lille te 1-1 in an inhnehtawk. Stade Pierre-Mauroy-a inkhelah mikhual team tan Nuno Mendes-a'n khung mah se Lilee-in minute 85-naah Kylian Mbappe nau Ethan Mbappe hmangin an sut.

Lille-in bul ṭan ṭha mah se team ṭha zawk PSG an insiamrem a, Bradley Barcola-a'n chance ṭha ṭum hnih a hlah. Goal a luh lawk loh avangin Luis Enrique-a'n bench aṭangin Achraf Hakimi, Vitinha leh Nuno Mendes te a luhtir a, minute 66-naah goal a lut.

Substitute Nuno Mendes chuan hla tak aṭangin freekick a khung a, Enrique-a'n substitution awmze nei a siam. Mahse, Lille an tlawm duh lo a, huai takin an nawr let. Minute 85-naah Ethan a rawn inlar a, Mbappe nau hian box chhung chiah aṭangin a pet lut. Gianluigi Donnarumma thlaktu Lucas Chevalier-a'n a dang thei lo a, PSG-in goalkeeper ṭha bik an neih loh an tuar niin a lang bawk.

Ethan hi PSG player hlui a nih avangin a goal khung a lawm duh lo a, a hmuna inkhel rawn entu a unaupa Mbappe erawh lawm avangin a nui nasa hle. PSG hian point hloh mah se match sarih aṭangin point 16 an hmu a, anmahni hnaih bertu Marseille aiin point khatin an hmu tam zawk.