India hmeichhiaten Pakistan an hneh

ICC Women's World Cup-ah India hmeichhe team-in Pathianni khan Pakistan chu 88 runs-in an hneh. R. Premadasa Stadium, Colombo-a inkhelah Pakistan-in vawm hmasak thlangin India-in 247 runs an siam a, Women in Green hian 159 runs chauhin an chhanglet.

India batter zingah che ṭha fal an awm lo a, an che ṭha rual. Harleen Deol-i'n 46 runs siamin, ani bakah hian run 20 siam tling paruk an awm a, hmeichhe inelnaah chuan 247 runs hi a ṭha thawkhat hle.

Pakistan tan Sidra Ameen-i'n 81 runs siam mah se thlawptu ṭha a nei lo a, India bowler-te an langsar ta zawk. Kranti Goud (20/3) leh Deepti Sharma (45/3) ten wicket thum ve ve an la a, India an chakpui.

Hmeichhe Cricket World Cup hi September 30, Thawhlehni aṭanga khelh ṭan niin November 2, Pathiannia khelh zawh tur a ni. Inelnaah hian team pariat India, Australia, England, Bangladesh,

Sri Lanka, Pakistan, New Zealand leh South Africa te an tel a, vawi khat ṭheuh an inkhelh kual hnuah a sang paliin semifinal an lut ang.