India ODI captain thar Shubman Gill

India-in West Indies nen Test match an khelh zawhah Australia nen ODI leh T20 series an khel dawn. BCCI chuan ODI captain atan Rohit Sharma aiah Shubman Gill an ruat thar a, sawi zui a hlawh hle. T20 lamah erawh Asia Cup-a champion puitu Suryakumar Yadav-a captain-na hnuaiah an khel zui ang.

ODI match thum khelh tura hmasa ber hi October 19, Pathianni hian Optus Stadium, Perth-ah khelh a ni dawn. Kum 26 mi Gill hian captain hna a chelh dawn a, BCCI lamin an duhsakah an ngai. Rohit Sharma hnuaiah India-in Asia Cup 2023 leh ICC Champions Trophy 2025 nomawi an chawi a, match 56 khelin vawi 42 an chak. Mahse, Rohit hi kum 38 mi a ni tawh a, chutihrualin captain hna a chelh tak loah chuan tun ṭuma squad-a tel captain hlui Virat Kohli nen 2027 World Cup an khelh theihna kawng a inhawng zim ta hle.

Shreyas Iyer-a'n vice captain hna a chelh dawn a, Maharashtra batter hi kum 30 mi a nih tawh avangin Rohit hi kum vanga captain chawlhtir a nih chuan captain tur zawka ngaih a ni. Tun hnaiah India-in result nei ṭha mah se khelmual pawn boruak hian Australia nena an inkhel turah 'pressure' an ngah phah sawt ang.

India squad

ODI squad: Shubman Gill (Captain), Rohit Sharma, Virat Kohli, Shreyas Iyer (VC), Axar Patel, KL Rahul (WK), Nitish Kumar Reddy, Washington Sundar, Kuldeep Yadav, Harshit Rana, Mohammed Siraj, Arshdeep Singh, Prasidh Krishna, Dhruv Jurel (WK), and Yashasvi Jaiswal.

T20I squad: Suryakumar Yadav (C), Abhishek Sharma, Shubman Gill (VC), Tilak Varma, Nitish Kumar Reddy, Shivam Dube, Axar Patel, Jitesh Sharma (WK), Varun Chakaravarthy, Jasprit Bumrah, Arshdeep Singh, Kuldeep Yadav, Harshit Rana, Sanju Samson (WK), Rinku Singh, and Washington Sundar.