Russell-a hun a thleng ve leh phawt

Pathianni zana tlan zawh tak Singapore Grand Prix-ah George Russell chu pakhatna a ni a, season kal laiah car intlansiakna sang berah hian a vawi hnih nan hnehna a chang.

McLaren driver pahnih Lando Norris leh Oscar Piastri te chu pathumna leh palina an ni a, hnehna chang chiah lo mah se an team hian point 650 an hmuh tlin tak avangin Constructor’s Championship-ah midang tan umphak theih an ni tawh lo, intlansiak hmabak paruk la awmah anmahni hnaih bertu Mercedes chuan point 325 an hmu ve thung a ni.

Driver champion lai Max Verstappen a la beidawng lo. Red Bull car khalhtu hi pahnihnaah thlengin, driver championship lamah a chunga awm Piastri leh Norris te a um zel a, boruak sangah tawnhriat a neih ṭhat avangin inelna a la hmuhnawm chhunzawm dawn.

Car intlansiakna sang ber hi Asia aṭangin United States lamah an insawn thla dawn, tun thla chawhnu lam hian Circuit of the Americas-ah US Grand Prix an tlan dawn, chumi hnuah Mexico leh Brazil lamah an tlan zui leh dawn a ni.