FIFA World Cup - Europe ram bik bihchianna

FIFA World Cup 2026 khel tur zawnna chu tun kar chho hian neih a ni leh dawn a, World Cup khel tur ram a hriat belh theih dawn. Nakkuma inelna neih turah ram 48 an tel dawn avangin Europe aṭanga World Cup khel thei zat pawh 16-ah tihpun a ni a, tun ṭumah hian Europe bik kan bihchiang ang.

A kalphung

UEFA-in Ukraine run vangin Russia a hrem a, qualifier-ah hian ram 54 an inlan. Ram 54 te hi group 12-ah ṭhen darh an ni a, group khata ram paruk awmna group pali awmin group khata ram panga awmna group paruk a awm bawk.

Group khat aṭanga a sang ber ṭheuh hi World Cup khel turin an tling nghal dawn a, hei hi group stage an tih chu an ni. Group stage aṭangin World Cup khel turin ram 12 an tling dawn.

Hmun ruak dang pali hi playoff hmanga zawn tur a ni a, group tina pahnihna ṭheuh (ram 12) bakah UEFA Nations League-a che ṭha ram paliten playoff an khel leh dawn. Playoff-ah hian team 16 an tel dawn a, slot liah team pali ṭheuha ṭhen an ni ang. Slot tina pakhatna ṭheuh hi World Cup khel turin an tling ang.

Group stage hi November thlaah khelh zawh a ni tawh dawn a, kuminah Europe aṭanga World Cup khel tur ram 12 chu a hriat dawn tihna a ni. Playoff hi March thlaah khelh zawh a ni ang a, playoff hi semifinal leh final-ah an ṭhen hrang.

Dinhmun ṭha

Europe ram ṭha zingah France, Spain leh Portugal ten match hnih khelhah an khingpui an la hneh vek a, World Cup inpettling turin harsatna lian tham awm turin a lang lo. Chutihrualin England-in bul an ṭan ṭha ber a, match nga khel tawhin an la chak vek a, November thla nghak kher loin October thlaa World Cup khel tura inpettlin theih dan a awm.

Croatia pawh match li an khelh tawhah an la chak vek a, Vatreni (Croatia football team sawina) hian an elpui ber Czech chu October 9, Ningani zan hian an hmachhawn dawn. Zlatko Dalic hote hian an hneh a nih chuan World Cup khel turah an chhal ngam ang a, an chak lo erawh chuan an dinhmun a chiang bik lo ang.

Tling lo thei!

World Cup-a record nei ṭha leh kum 2014 champion Germany an la che fuh thei lo a, match hmasa bera Slovakia an hneh loh avangin an group-ah pathumnaah an awm mek. Chutihrualin Julian Nagelsmann-a hote hi an khelh hmabaka an chak vek chuan playoff khelh ngai loin an inpettling ang.

Euro 2020 champion Italy tan pawh World Cup khelh a awlsam dawn lo. Gli Azzurri hian match liah point kua chauh an hmu a, table chung bera awm Norway-in match ngaah point 15 an hmu tawh. Erling Haaland leh Martin Odegaard te ram Norway hian World Cup an khelh ngei a rinawm hle.