Hojlund leh Napoli an sang zel

Rasmus Hojlund-a goal hmangin Napoli chuan Genoa 2-1 in an hneh. Inkhel dangah AC Milan leh Juventus te 0-0 a an inhnehtawk avangin Naples club hi Serie A table chung berah an inhlangkai leh ta a ni.

Pathianni zan khan Diego Maradona Stadium-ah Napoli hian mikhual an thleng a, goal an chhuah hmasa. Chawlhlawk hma deuhin Genoa tan Jeff Ekhator chuan mawi zetin a kheng lut a, 1-0 in chawlhlawk an hmang.

Second half-ah Napoli lamin na takin an nawr, Andre-Frank Anguissa chuan si phurh sutna a tauh luh hnuah Rasmus Hojlund chuan goalkeeper Nicola Leali-a dan per chu hnai tak aṭangin a khung a, an chak tlang pui.

Manchester United duh loh Hojlund hian a theihna a pholang chho mek - Italian club tan hian season kal laiah match ruk a khelh aṭangin goal li a khung tawh, a la khung belh zel pawhin a rinawm.

Napoli coach Antonio Conte chuan, "Season hmasa kha chuan Champions League kan khel lo a, Serie A bak kha chu inelna dang hmachhawn rei kan nei lo bawk. Tun season erawh kan tan a harsa tawh dawn, hla tak taka zin hnua match khel leh tur chuan squad kan chhah pawh a ngai dawn," a ti.

Pathianni zan inkhel dangah AC Milan leh Juventus te goal lut loin an inhnehtawk. Milan hian goal khung theihna remchang bik an nei a, mahse American midfielder Christian Pulisic hian penalty a hlah, point khatah an lungawi a ṭul ta zawk.