Palace an tlawm ve ta

Match 19 zet a zawna an tlawm tawh loh hnuah Crystal Palace an tlawm ve ta a, an mikhualna ramah Everton chu 2-1 in an ngam lo - hun pek belha goal khung a, Liverpool laka chak Palace hi Everton lakah hun pek belha goal lut vangin an tlawm ve leh ta thung.

Palace-in khualmualah goal an khung hmasa zawk a, Daniel Munoz chuan minute 37-naah Hill Dickinson Stadium-a Everton fans 50,000 dawn chu a ngawihtir.

Mahse, beisei ang erawhin thil a kal zui lo. Palace centre back Maxence Lacroix-a'n ṭul lo takin substitute Tim Iroegbunam lakah penalty a chawi a, Iliman Ndiaye chuan harsatna nei loin goal-ah a chantir.

Everton-in chak ngei tumin an bei zui a, hun pek belh minute thumnaah khel ṭha em em mai Jack Grealish-a'n vannei takin chakna goal a khung - Beto-a ball tauh, Dean Henderson-a'n a dan per aṭanga kal zel chuan Grealish hi perin, goal-ah a lut a, Everton jersey nena a goal khung hmasak ber a ni.

Grealish tan April 2 hnua Premier League-a goal a khung leh hmasak ber a ni a, Palace tan April 16 hnua inelna hrang hranga an tlawm lehna hmasa ber a ni thung.