Forest tan khua a var thei lo!

Pathianni zan khan Newcastle United chuan 2-0 in Nottingham Forest an hneh a, Forest manager Ange Postecoglou-a tan mangchhia a tawp thei lo - Forest a enkawl hnuah a la chak lo a, inelna hrang hranga match sarih a kaihhruai tawhah an la chak lo!

Forest an hmachhawn hmaa tun season Premier League-a goal khung tlem ber Newcastle-in goal khung an harsat a, mahse, minute 58-naah an rilru hah tihthawven nan Bruno Guimarães chuan goal hmahruai a khung.

Brazilian midfielder hi goal a khung hmain Morgan Gibbs-White lakah a foul niin a lang a, Forest player-te lawm loin referee Peter Bankes din hual nghal mah se, a ngaihdan a thlak lo - score chu 1-0 a ni.

Minute 84-naah Forest bawk an chesual a, Elliot Anderson chuan Guimaraes titluin penalty a chawi. Magpies tan striker thar Nick Woltemade chuan goal-ah a chantir a, Magpies a pan hnuah inelna hrang hranga match sarih a khelh aṭangin goal li a khung ta.

Kum 23 mi striker hi Les Ferdinand (1995) leh Alan Shearer (1996) hnua Newcastle player, St James Park-a a EPL match hmasa pathuma goal khung vek thei awmchhun a ni - a crossbar pet perte chu uiawm tak a ni.

Magpies hi an vanneih zan ni se, goal tam zawk khung thei an ni a, Nottingham Forest keeper Matz Sels a che ṭha hlauh zawk - Sels hian Sandro Tonali khung ngei tur nia lang chu a dansak a, Malick Thiaw leh Harvey Barnes te chance neih a dansak bawk.

Newcastle fan-te chuan Forest coach Postecoglou au elin, "Naktuk zingah an ban dawn che," an ti - Forest fan-te pawhin Tottenham Hotspur coach hlui hi ban an duh a, dawhtheihna tlachham ve tak, club neitu Evangelos Marinakis rilru hriat a châkawm hle.

Hetihlai hian Forest coach Postecoglou chuan club neitu Marinakis leh thuneitute nena inkawm a duh thu a sawi chhuak a, "Kan kal zel dan tur, eng nge kan duh ber a, eng nge kan hmachhawp zel hriat nan inbiak a ngai a ni," a ti.

Season hmasaa Europa League-a Spurs champion puitu coach chuan, "Kar thum leh a chanve chauh he hmunah hian ka la awm a, match sarih bak kan la khel lo. Mipuiin he hun rei lote chhunga thutlukna siam an duh a nih pawhin ka dem lo.

"Hun harsa kan tawng mek a, hei chu thil nih ve ṭhin dan pawh a ni. A nihna takah chuan, mahni in lumah nuamsa taka awm a, inkhel en thei ka ni a, mahse, kei chuan club enkawl hi nuam ka ti zawk a, chona hmachhawn hi nuam ka ti a ni," a la ti!

International break an hmang ang a, Forest-in match an neih leh hmasak ber tur chu October 18 niin, Chelsea an mikhual ang a, Europa League-ah team ṭha FC Porto mikhual zuiin, beisei phak baka season hmang ṭha Bournemouth leh club lian Manchester United an hmachhawn zui dawn!