Oct 21-ah MPL league round zo dawn

GIG Motors MPL12 league round chu October 21, Thawhlehniah khelh zawh a ni dawn a, round li khelh tur a la awm. Team hrang hrang dinhmun thlirin Mizoram chhunga football inelna sang ber hi a la hmuhnawm dawn chauh niin a lang.

Aizawl FC-in pakhatna dinhmuh an sawhnghet ṭan a, semifinal an lut chiang tawh. Chutihrualin semifinal khel tur dang team pathum hriatthiam a la har a, I League club Chanmari FC thlengin an dinhmun a la him lo. September thla khan transfer hun a zo a, inziahluh belh an awm avangin round hnuhnung lamah player thar inlan tur an awm dawn a, hei hi MPL ti ngaihnawmtu tur a ni ang .

Semifinal lut tur a la chian loh ang bawkin relegation playoff khel tur pawh a la chiang lo. Table mawngphaha awm SYS FC hi thilmak a thleng a nih loh chuan relegate turah an ngaih ṭan theih a, mah se pasarihna awm mek Mizoram Police-in relegation playoff pumpelh ngei an tum.

Lawngtlaiah hlawhtling takin MPL round 10 khelh a ni a, round 11 hi October 8-9, 2025 hian RG Stadium-ah khelh tur a ni.