Ranji atan Mizoramin Kolkata-ah training nei

Cricket Association of Mizoram (CAM) hnuaia senior team te chu Ranji Trophy 2025 khel turin an inbuatsaih mek a, tun kar chhung hian MGR Academy, Kolkata-ah training an nei dawn a ni.

Mizoram team hian Kolkata khawpui an thleng tawh a, India ram pum huap inelna hmachhawn tur hian Mizorama inbuatsaihna an neih hnuin Kolkata-ah hian training dang an nei leh dawn a, kar khat chhung awh tur a ni ang.

Mizoram captain Joseph Lalthankhuma chuan, "Hmun hma kan indaih loh deuh avangin duhthusam ang thlapa inbuatsaih theih a ni lo a, chutihrualin kan hun leh hmun neih angah chuan kan inbuatsaihna a ṭha a, theihtawp kan chhuah tlang vek.

"Tawnhriat nei ṭha tak tak an awm a, chung karah chuan player naupang leh thaza rual an awm bawk. Squad an inchawhpawlh ṭha tawk em em a, kuminah hian result ṭha neih theih kan tum, chumi tur chuan theihtawp kan chhuah dawn a ni," tiin Vanglaini a hrilh.

Ranji Trophy-ah Mizoram hi plate group-ah an awm, an match hmasa ber atan October 15-18 chhung hian Meghalaya an hmachhawn dawn, an inkhelhna tur hi Shillong a ni ang; chumi hnuah Arunachal Pradesh, Sikkim, Manipur leh Bihar te an la hmachhawn leh dawn a ni.

Mizoram hian kumin chhungin Ranji Trophy bakah Syed Mustaq Ali Trophy leh Vijay Hazare Trophy te pawh khelh tur an nei dawn a, Vijay Hazare Trophy bik hi chu kumin tawp lam leh nakkum tir lamah khelh tura ruahman a ni.