Man United lawmna siamtu Sesko leh Lammens

Manchester United-in Inrinni zan Premier League inkhelah kai thar Sunderland 2-0 in an hneh. Old Trafford-a inkhelah Mason Mount leh Benjamin Sesko ten goal an khung a, goalkeeper thar Senne Lammens pawhin clean sheet nen club thar tan bul a ṭan.

Ruben Amorim-a'n phurrit chhawng zângkhai a ni a, international break zawhah Anfield an tlawh dawn. Man United khingpui tur Liverpool hi champion lai ni mah se a zawnin match thum an chak tawh lo a, Arne Slot sawiselna ri hriat tur a tam ṭan hle.

Bul ṭan ṭha

Man United-in goal an khung hma a, minute riatna lekah Bryan Mbeumo cross chu box chhung chiahah Mason Mount-a'n la thlain goal kilah a volley lut nghal. Kum 26 mi Mount hian July 2023 daih tawh khan Man United hi zawm mah se tun ṭum hi United jersey ha chunga Premier League-a Old Trafford-a goal a khung hmasak ber a ni.

Amorim-a hote an phur chho zel a, Amad Diallo-a'n dinglam aṭanga ṭha tak a lakluh hnuah a ball pet ṭha chu keeper Robin Roefs-a'n a dansak. Sunderland keeper hian Mbeumo goal khung tur pawh ṭha takin a dang.

Captain Bruno Fernandes pawhin mawi zetin box pawn chiah aṭangin goal kilah a pet a, keeper Roefs-a'n a khawih fuh hnuah goal ban perin goal-ah a lut ta lo. Man United ṭantuten minute 31-naah goal an hmu leh a, striker manto Sekso-a'n box chhung aṭangin striker goal a khung. Slovenian striker hian match zawnin goal a khung a, inrintawkna a neih phah dawn.

Lammens a rintlak?

Nipui bazar tawp niah Man United-in Lammens an lalut a, Belgian keeper hi an chhawr leh lawk avangin club thutluknain sawisel a hlawh. Black Cats lakah Lammens-a'n bul a ṭan a, a khelh ṭhat avangin club legend Peter Schmeichel nena khaikhin a ni hial.

Chutihrualin Sunderland hian penalty hmu turah inngai mah se VAR hmanga ennawn hnuah pek an ni lo. Sesko a khai sang hret a, box chhungah Nordi Mukiele lu bula a ke a khai. Mahse, United striker hian a pet fuh lo a, penalty hi pek a ni lo.

Goal mamawh Sunderland-in goal khung theihna an nei a, box pawn aṭanga Granit Xhaka ball pet kawh ṭha chu Lammens-a'n a dang. Hun tawp dawn hnaiah Chemsdine Talbi-a'n keeper chauh hmachhawn mah se keeper Lammens-a'n a dansak.

Belgian keeper hian ball cross sang ṭha laia man ṭum hnih a nei a, a khelh danah United ṭantute an lawm. Lammens a chet ṭhat avangin tun season-a a vawi khat nan Man United-in clean sheet an nei a, Amorim-a leh a hote tan chanchin lawmawm a tling.