India tana inlan tur Ṭhazuala & Ramsanga

BWF World Junior Championship 2025, Guwahati, India-a khelh turah Mizo rawlthar pahnih, H. Lalṭhazuala leh C. Lalramsanga te chu India aiawhin an inlan dawn a, Mizo zinga he inelnaa inlan thei hmasa ber an ni dawn.

Tun inelna hi India-in kum 17 hnua world junior championship a thlen leh hmasak ber tur a ni a, team inelna, Suhandinata Cup tia hriat lar hmangin vawiinah bul an ṭan ang a, October 11, Inrinni thleng neih a ni ang.

National Centre of Excellence, Guwahati-a neih inelna hi, October 13-19 ah mimal inelna neih leh tur niin, Chanmari West rawlthar H. Lalṭhazuala hi boy's singles category-ah a inlan dawn a, Durtlang rawlthar Ramsanga hi mixed doubles category huangah a kawppui Taarini Suri nen an inlan dawn thung.

India aiawh tura kohte hian selection trial hmachhawnin, Ṭhazuala hi player 25 thlanchhuah zingah boy's singles-a inlan tur shuttler pali zingah telh a ni a, Ramsanga te pawh hi mixed doubles-a pair thlan pali zingah an tel phak a ni - a ropui thlawt.

Kum 2008 hnua a vawi khat nana India-in a thlen, BWF World Junior Championship-ah hian ram 37 aṭangin shuttler an fuankhawm a, ram 37-te hi group pariatah ṭhendarh niin, India hi group H-ah, Hong Kong China, Nepal leh Ghana te nen an awm ho.

Group tina a sang berte hian quarterfinal an lut dawn - India hi seeded no 2 an ni phak. Team inelna zawh a nih hnuah, a hmun ngaiah mimal inelna neih chhunzawm a ni ang.

India aiawh turte hi state 13 aṭanga thlanchuah niin, Mizoram tih loh, hmarchhak state dang aṭangin shuttler tel phak an awm lo.

Mizoram Badminton Association chuan thuchhuah siamin, "India aiawha BWF World Junior Championship hmachhawn tur kan player-te hi kan chhuang takzet a. Hriselna ṭha nei a, an theihna leh thiamna ang ngei a khelchhuak tur leh, a sang thei ang ber thleng turin duhsakna kan hlan a ni," an ti.