Forest leh Aston Villa an inlan dawn; Tlarhma lam an hriam a ngai - Postecoglou

Nottingham Forest manager Ange Postecoglou chuan goal khung turin an insiamrem a ngai tih a sawi a, an hmatawngte chu an khingpui goal hmaah hriam zual deuh turin a duh.

Premier League club hian Europa League khel turin zanin dar 12:30 hian Midtjylland an mikhual dawn, coach thar Postecoglou enkawlna hnuaiah chak ni hmel hmuh an châk a, an tan chuan zanin hi hun ṭha a nih a rinawm.

Nuno Espirito Santo thlaktu Postecoglou hoin Forest hian match li an khel tawh, vawi hnih inhnehtawkin a dang pahnihah chuan an tlawm - an match hnuhnung bera Sunderland an hmachhawn ṭumin hun ṭha an hlah nasa, a tawpah an tuar.

Postecoglou chuan, "Inkhel thunun tak chung sia goal khung theih loh chu a tawpah a pawi ṭhin. Kan inkhel hi ngun taka en let chuan, chak turin theihna kan nei a, vanneihna kan mamawh tel ṭhin. Tun ṭumah chuan kan vanneih ngei pawh ka beisei.

"Ka naute hian theihna sang tak an nei, season hmasa pawh khan kan lo hmu tawh. Inrintawkna nen ṭha taka an khelh phawt chuan team lian zawk lakah pawh result ṭha nei thei tur kan ni," tiin a sawi a, zaninah chak ngei a tum ruh hle.

Zanin dar 12:30 tho hian Aston Villa chu Feyenoord khelmualah an lenglut dawn a, an match hnuhnung pahiha hnehna chang thei Unai Emery leh a naute tan an boruak ṭha chhawm nun theihna remchang a ni ang.

Team pahnihte hi European football huangah chuan an intawn vawi khatna tur a ni. Dutch club dang lakah chuan Villa hian sulhnu an nei ṭha, vawi nga an hmachhawn tawhah vawi li chakin ṭum khat chu an inhnehtawkpui thung - zaninah pawh inrintawkna an nei sang dawn.