Goal khung thiam thar Atletico

Atletico Madrid-in beisei angin season bul ṭan lo mah se, Real Madrid laka hnehna an chan hnuah goal khung an thiamzia an pholang nawn - Champions League-ah an mikhual Eintracht Frankfurt chu 5-1 in an sawp.

Diego Simeone-a naute hi Madrid derby-a 5-2 ngawta Real hneh hlim an ni a, Frankfurt lakah pawh mikhual chunga ṭhatna an lantir lo.

Atletico tan Giacomo Raspadori, Robin Le Normand, Antoine Griezmann, Giuliano Simeone leh Julián Álvarez (penalty) ten goal khat ṭheuh an khung a, German club tana Jonathan Burkardt goal khung chu mualpho zualpui khuhna chauh a tling tawh.

Griezmann-a'n goal a khung khan Atletico tana goal 200 a khungna chiah a ni a, khati zat goal khung tur khan match 454 khelhsakin, assist vawi 93 ngawt a nei thei bawk.

Argentine coach rorum Diego Simeone-a'n hrem vangin khelmualah a naute a ho thei lo a, beisei phak baka ṭhain an khel ta tho - Simeone hi Anfield-a Liverpool an ngam loh ṭum khan mawi lo takin a che a, hei vang hian match khat atan hrem a ni.